ធន់ មករា ប្រកួតសប្ដាហ៍មុននេះដូចខឹងថៃតាំងពីពេលណាមក…
ថ្ងៃទី ០៨ ខែមេសា ឆ្នាំ២០១៩ ម៉ោង 2:38PM
ធន់ មករា ប្រកួតមិត្តភាពអន្តរជាតិកាលពីថ្ងៃសៅរ៍ ទី៦ មេសា ២០១៩ លើកនេះដូចខឹងកីឡាករថៃ តាំងពីពេលណាមកម្ល៉េះ បុករហូតដល់ដៃគូសន្លប់ក្នុងទឹកទី៣។
កូនសិស្សលោក ធន់ សុភា ខាងលើនេះប្រកួតហាក់ដូចជាកាចជាងរាល់ដងរបស់គេ ពោលលលើកមុនៗវ៉ៃតាមដំណើរប៉ុណ្ណោះ មិនសូវជាបុកនោះឡើយប៉ុន្តែសម្រាប់ជំនួបមិត្តភាពកាលពីថ្ងៃសៅរ៍សប្ដាហ៍មុននេះ ហាក់ស្រេចឃ្លាននិងជ័យជម្នះតែម្ដង។
មករា មិនសូវជាស្ទាបស្ទង់ច្រើនឡើយ ពោលព្យាយាមឆកកណ្ដាប់ដៃបានច្រើន ចំណែកការទាត់ជើងក្រោមក៏លឿនថែមទៀតផង។ ម្ចាស់ជើងឯកពានរង្វាន់ TV5 ទម្ងន់ ៥៧គីឡូក្រាម របស់សង្វៀនប៉ុស្តិ៍លេខ៥ រូបនេះ ប្រើស្នៀតបត់កែង កែងបក និងបុកកែងច្រើនមែនទែន ខណៈកីឡាករថៃព្យាយាមវ៉ៃកាត់ផង ទាត់ផង និងបកកែងវិញដែរ ប៉ុន្តែនៅតែមិនអាចធ្វើអ្វីអ្នកលេងគុនខ្មែរបានឡើយ។ ទោះត្រូវកែងបុករបស់ ធន់ មករា បែកឈាមស្ទើរងើបលែងចង់រួចទៅហើយក្ដី ប៉ុន្តែកីឡាករថៃ យ៉ត កាតាំងយូ នៅចង់បន្តការប្រកួតទៀត ស្រប់ពេលអាជ្ញាកណ្ដាលរាប់បានតែបន្តិចក៏សម្រេចចិត្តបញ្ឈប់ត្រឹមទឹកទី៣តែម្ដង ព្រោះខ្លាចគ្រោះថ្នាក់ខ្លាំងជាងនេះ។
រំលឹកដែរថា ធន់ មករា ប្រកួតជាគូឯកប្រចាំសប្ដាហ៍របស់សង្វៀន TV5 កាលពីថ្ងៃសៅរ៍ ទី៦ មេសា ដែលត្រូវប្រកួតមិត្តភាពអន្តរជាតិជាមួយកីឡាករថៃ យ៉ត កាតាំងយូ ដោយផ្ដួលថៃរូបនេះឲ្យសន្លប់ក្នុងទឹកទី៣៕
អត្ថបទ៖ ពេជ្រ គឹមស្រ៊ិន
