Man Utd កោះប្រមូលទ័ពត្រៀមទប់ទល់ Barca នៅ Champions League
ថ្ងៃទី ០៨ ខែមេសា ឆ្នាំ២០១៩ ម៉ោង 12:23PM
Manchester United នឹងបើកទ្វារកីឡដ្ឋាន Old Trafford របស់ខ្លួនស្វាគមន៍ FC Barcelona ក្នុងការប្រកួត UEFA Champions League វគ្គ៨ក្រុមចុងក្រោយនៅយប់ថ្ងៃពុធខាងមុខនេះ។
មុនការប្រកួតមកដល់ លោក Ole Gunnar Solskjaer បានកោះប្រជុំកូនក្រុមរបស់ខ្លួនធ្វើការហ្វឹកហាត់ដើម្បីត្រៀមលក្ខណៈទទួលភ្ញៀវដែលជាគីឡូយក្សប្រចាំទ្វីបអឺរ៉ុប ហើយមុននេះ២៤ម៉ោង អ្នកចាត់ការសញ្ជាតិន័រវែសក៏បានទៅអង្គុយមើល Barcelona យកឈ្នះ Atletico Madrid ២-០ ក្នុងការប្រកួត La Liga ដែរ។
ក្រុមបិសាចក្រហមគ្មានការប្រកួតនោះទេកាលពីចុងសប្ដាហ៍ ដូច្នេះចង់មិនចង់ពួកគេនឹងចំណេញកម្លាំងជាង Barcelona ដែលជាប់លេង La Liga និងត្រូវធ្វើដំណើរផ្លូវឆ្ងាយមកកាន់ប្រទេសអង់គ្លេស។ David de Gea, Romelu Lukaku និង Alexis Sanchez សុទ្ធតែឃើញមុខក្នុងការប្រមូលផ្ដុំហ្វឹកហាត់ដ៏សំខាន់នេះ៕
