សេតវិមានទទួលស្គាល់ថា សហរដ្ឋអាមេរិកខ្វះឧបករណ៍ធ្វើតេស្តជំងឺ COVID-19
(អាមេរិក)៖ សេតវិមានបានទទួលស្គាល់ថា សហរដ្ឋអាមេរិកពុំមានឧបករណ៍ធ្វើតេស្តជំងឺ COVID-19 គ្រប់គ្រាន់ ខណៈករណីឆ្លងជំងឺនេះបានកើនឡើងនៅតំបន់ឆ្នេរសមុទ្រទាំង២ របស់សហរដ្ឋអាមេរិក។ អនុប្រធានាធិបតីលោក Mike Pence បាននិយាយថា រដ្ឋបាលលោក Trump នឹងមិនអាចបំពេញតម្រូវការវត្ថុបំណងរបស់ខ្លួន ក្នុងការបញ្ជូនឧបករណ៍ធ្វើតេស្តសម្រាប់មនុស្សចំនួន ១លាននាក់នៅសប្ដាហ៍នេះបានទេ។
ជាមួយគ្នានោះ សភាបានបោះជំហានទៅមុខក្នុងល្បឿនលឿនខុសពីធម្មតា ដើម្បីអនុម័តកញ្ចប់ថវិកាជំនួយសង្គ្រោះបន្ទាន់ ដើម្បីប្រយុទ្ធប្រឆាំងនឹងការរីករាលដាលជំងឺនេះ។ នៅទូទាំងពិភពលោក ក្រុមអាជ្ញាធរបានបញ្ជាក់ថា មានអ្នកឆ្លងជំងឺ COVID-19 ជាង ៩២,០០០នាក់។ ចំនួនអ្នកបាត់បង់ជីវិតនៅសហរដ្ឋអាមេរិកដោយសារជំងឺ COVID-19 បានឡើងដល់ ១២នាក់កាលពីថ្ងៃព្រហស្បតិ៍ ក្នុងនោះម្នាក់ក្នុងចំណោមជនរងគ្រោះទាំងអស់ ស្ថិតនៅក្នុងភាគពាយ័ព្យនៃរដ្ឋ Washington។ បច្ចុប្បន្ននេះមានមនុស្សជាង ២០០នាក់បានឆ្លងជំងឺ COVID-19 នៅក្នុងរដ្ឋចំនួន២០៕
