Real Madrid បានយកឈ្នះ Barcelona ក្នុងលទ្ធផល ២ទល់នឹង០

អេស្ប៉ាញ៖ នៅក្នុងការប្រកួតដ៏ធំប្រចាំក្របខណ្ឌ La Liga កាលពីយប់មិញ គឺជំនួប El Clasico ក្លិបអធិរាជស Real Madrid បានយកឈ្នះ Barcelona ក្នុងលទ្ធផល ២ទល់នឹង០ ក្រោមក្រសែភ្នែកអ្នកគាំទ្រចូលរួមទស្សនាផ្ទាល់ជិត៨ម៉ឺននាក់នៅកីឡដ្ឋាន Santiago Bernabeu។នៅក្នុងការប្រកួតនោះ Real Madrid មានឱកាសសម្រុកច្រើនទៅលើក្រុមភ្ញៀវ ដោយទាត់ទីចំនួន១០លើក ចំគោលដៅ៤លើក និងមានឱកាសទាត់បាល់ចេញពីជ្រុង៨លើក ខណៈ Barcelona មានឱកាសស៊ុតត្រឹមតែ៥លើក ចំគោលដៅ៣លើក និងមានឱកាសទាត់បាល់ចេញពីជ្រុងតែ២លើកប៉ុណ្ណោះ។

បើទោះបីជាមានឱកាសច្រើន ប៉ុន្តែក្រុមរបស់លោក Zidane រកបានគ្រាប់បាល់បានតែ២ប៉ុណ្ណោះ ដោយគ្រាប់បាល់ទី១ធ្វើបានសម្រេចដោយខ្សែប្រយុទ្ធវ័យក្មេងប្រេស៊ីល Vinicius Junior និងគ្រាប់បាល់ទីពីរធ្វើបានដោយកីឡាករ Mariano Diaz នៅក្នុងម៉ោងបន្ថែមវគ្គទីពីរ។

នេះគឺជាជ័យជម្នះលើកដំបូងហើយរបស់ Real Madrid ក្នុងរយៈពេល៦ឆ្នាំ ទៅលើ Barcelona ក្នុងជំនួប El Clasico ក្នុងទីដីរបស់ខ្លួន ខណៈការឈ្នះលើកចុងក្រោយនៅកំឡុងខែតុលា ឆ្នាំ២០១៤ ដោយពេលនោះ Real Madrid បានយកឈ្នះ Barcelona ៣-១។

គួរឲ្យដឹងផងដែរថា ក្រោយបាន៣ពិន្ទុពីការប្រកួតនោះ Real Madrid បានវ៉ាមកឈរកំពូលតារាងក្របខណ្ឌ La Liga ដោយមាន៥៦ពិន្ទុនៅក្នុងដៃ ខណៈ Barcelona ឈរនៅលេខ២ មាន៥៥ពិន្ទុ៕