ងួន សុបិន បន្ថែមអាជីពចម្រៀង បទថ្មីន័យចាក់ដោតខ្លាំងដល់អ្នកពូកែផឹក មុនចូលឆ្នាំ
ភ្នំពេញ ៖ កន្លងៗមកមហាជនតែងកត់សម្គាល់ឃើញអ្នកនិពន្ធឆ្នើមប្រចាំថោនលោក ងួន សុបិន បានបង្ហាញទេពកោសល្យពីធម្មជាតិក្នុងសិល្បៈស្ទើរតែគ្រប់ទម្រង់ ពោលក្រៅពីនិពន្ធបទចម្រៀង លោកថែមទាំងអាចសម្តែង និងកំប្លែងសើចចុកពោះ ប៉ុន្តែអ្វីកាន់តែភ្ញាក់ផ្អើល និងគួរឲ្យសរសើរនោះពេលនេះលោកបានបន្ថែមនូវអាជីពចម្រៀងមួយទៀត ដោយបទថ្មីរបស់លោកត្រូវបានបង្ហាញលើឆានែលយូធូបរបស់ FTV Entertainment រួចហើយ។
បទចម្រៀងនេះមានចំណងជើងថា «ដាក់!» ច្រៀងរួមគ្នាដោយលោក សុបិន និងឌីជេ កាកា ដែលអត្ថន័យចាក់ដោតខ្លាំងដល់អ្នកពូកែផឹកនោះ ត្រូវបានអ្នកនិពន្ធថោនរូបនេះបញ្ជាក់ប្រាប់ តារាញូស៍ ថា «ផលិតកម្មមួយនេះថ្មី ហើយបានហៅលោកទៅច្រៀងដើម្បីត្រៀមអបអរពិធីបុណ្យចូលឆ្នាំខាងមុខនេះ ចំពោះតារាចម្រៀងក្រៅពីរូបលោកនៅមាន សៅ ឧត្តម សុវត្ថិឌី ធារិកា និងតារាថ្មីៗជាច្រើនទៀត»។ ចំពោះក្តីរំពឹងថាផ្ទុះ ឬមានការគាំទ្រខ្លាំងនោះម្ចាស់ទំនុកបទ «ជីវិតអ្នកប្រដាល់» បានបន្ថែមថា «មិនជារំពឹងខ្ពស់ពេកទេ ម្យ៉ាងបទនេះចេញរាងកៀកចូលឆ្នាំហើយ តែលោកជឿថាក្រោយពីចូលឆ្នាំនឹងមានការយកទៅច្រៀង ឬរាំលេងកំសាន្ត តាមអកកេះ និងអកកណ្តង់ វិញ»។
ចំពោះចំណាប់អារម្មណ៍ពេលឈោងចាប់អាជីពជាអ្នកចម្រៀងនេះត្រូវអ្នកកំប្លែងពូកែវោហាររូបនេះប្រាប់ថា «ពិតជារំភើប និងសង្ឃឹមបងប្អូនបន្តទទួលយករូបលោកដាក់ក្នុងបេះដូង»។ ទន្ទឹមនេះលោក ងួន សុបិន ក៏បានលើកសរសើរចំពោះផលិតកម្មថ្មីនេះដែលមានបំណងលើកស្ទួយសិល្បៈ ពិសេសផ្តល់ឱកាសដល់អ្នកចម្រៀងថ្មីៗបានបង្ហាញសមត្ថភាពដល់មហាជន។
Video នៅខាងក្រោមនេះ
អត្ថបទ កែវ ច័ន្ទសុផាវរុណ
https://youtu.be/aPNwdlxStpE
