នៅព្រឹកថ្ងៃអាទិត្យនេះ អ្នកដំណើរនិងបុគ្គលិកនៅលើនាវាកម្សាន្ត MS Westerdam មិនត្រូវបានអនុញ្ញាតឲ្យចេញឡើយ
(ព្រសីហនុ)៖ អ្នកដំណើរនិងបុគ្គលិកនាវាមិនត្រូវបានអនុញ្ញាតឲ្យចេញពីនាវាកម្សាន្តអន្តរជាតិ MS Westerdam ដែលចតនៅក្រុងព្រះសីហនុនោះទេនៅព្រឹកថ្ងៃអាទិត្យនេះ ក្រោយមានព័ត៌មានថា អ្នកដំណើរជនជាតិអាមេរិកកាំងម្នាក់បានផ្ទុកវីរុសកូរ៉ូណា ដោយត្រូវបានរកឃើញនៅប្រទេសម៉ាឡេស៊ី។
កាលពីយប់ថ្ងៃសៅរ៍ អាជ្ញាធរ និងមន្ត្រីសុខាភិបាលម៉ាឡេស៊ីបានរកឃើញថា អ្នកដំណើរម្នាក់តាមនាវា MS Westerdam ដែលបានចុះចតនៅកម្ពុជាកាលពីថ្ងៃព្រហស្បតិ៍មានផ្ទុកមេរោគកូរ៉ូណាវីរុស Covid-19 បន្ទាប់ពីស្រ្តីវ័យ ៨៣ឆ្នាំ ជនជាតិអាមេរិកកាំង បានធ្វើដំណើរតាមយន្តហោះពីទីក្រុងភ្នំពេញឆ្ពោះទៅកាន់ប្រទេសម៉ាឡេស៊ី។ នេះបើយោងតាមសារព័ត៌មានក្នុងស្រុករបស់ម៉ាឡេស៊ី។
មន្ត្រីសុខាភិបាលម៉ាឡេស៊ី លោក Noor Hisham Abdullah ត្រូវបានដកស្រង់សម្តីតាមសារព័ត៌មាន Malaysiakini ថា ការត្រួតពិនិត្យសុខភាពនៅអាកាសយានដ្ឋានកូឡាឡាំពួរបានរកឃើញថា អ្នកធ្វើដំណើរពីររូប ក្នុងនោះរួមមានស្ត្រីជនជាតិអាមេរិកាំងម្នាក់ដែលធ្វើដំណើរពីកម្ពុជា មានអាការៈសុខភាពដែលអាចបង្កឡើងដោយមេរោគកូរ៉ូណាវីរុស។
លោកបានថ្លែងថា៖ «ការធ្វើតេស្តពិនិត្យរកមេរោគ Covid-19 ត្រូវបានធ្វើឡើងដោយវិទ្យាស្ថានស្រាវជ្រាវវេជ្ជសាស្ត្រ “Institute for Medical Research” ហើយស្ត្រី [ជនជាតិអាមេរិក]ម្នាក់នោះត្រូវបានរកឃើញថា មានផ្ទុកមេរោគនេះ នៅថ្ងៃទី១៥ ខែកុម្ភៈ»។ស្ត្រីអាមេរិកាំងរូបនេះគឺជា អ្នកដំណើរម្នាក់ក្នុងចំណោមអ្នកដំណើរចំនួន ជាង ២០០០នាក់តាមនាវាកម្សាន្ត Westerdam របស់ក្រុមហ៊ុន Holland America Line ដែលរដ្ឋាភិបាលចំនួនបួន រួមមានជប៉ុន តៃវ៉ាន់ ហ្វីលីពីន និងថៃ បដិសេធមិនឲ្យចូលចត ដោយសារបារម្ភថា អ្នកដំណើរទាំងនោះអាចមានមេរោគកូរ៉ូណា។
សារព័ត៌មានក្នុងស្រុករបស់ម៉ាឡេស៊ីដដែលបានឲ្យដឹងថា ស្ត្រីអាមេរិកាំងរូបនេះកំពុងទទួលការព្យាបាលនៅមន្ទីរពេទ្យ Sungai Buloh ក្នុងប្រទេសម៉ាឡេស៊ី។ រីឯស្វាមីរបស់ស្ត្រីអាមេរិកាំងរូបនេះត្រូវបានរាយការណ៍ថា មិនមានផ្ទុកមេរោគ កូរ៉ូណាវីរុសទេ ប៉ុន្តែកំពុងត្រូវបានមន្ត្រីសុខាភិបាលម៉ាឡេស៊ីតាមដានស្ថានភាពសុខភាព។
អ្នកបើកឡានម្នាក់ ឈ្មោះ លី អាយុ៥៣ឆ្នាំ បានប្រាប់ នៅម៉ោងជិត៨ព្រឹកថ្ងៃអាទិត្យនេះថា លោកនិងអ្នកបើកបរ៥នាក់ផ្សេងទៀត ត្រូវបានប្រាប់ឲ្យត្រៀមដឹកអ្នកដំណើរ តាំងពីម៉ោង៥ព្រឹក តែរហូតមកដល់ពេលនេះ មិនទាន់បានដឹកនៅឡើយទេ។ លោកយល់ថា ជើងយន្តហោះសម្រាប់ធ្វើដំណើរថ្ងៃនេះ ត្រូវបានលុបចោល។
លោក លី ដែលមានកូន៤នាក់ បានប្រាប់ថា លោកចាប់ផ្តើមមានការព្រួយបារម្ភកាន់តែខ្លាំង ក្រោយមានព័ត៌មាននៃអ្នកផ្ទុះវីរុសនេះ។លោកមានប្រសាសន៍ថា៖ «មានការព្រួយបារម្ភខ្លាំងដែរ ព្រោះខ្ញុំមានប្រពន្ធ មានកូន ខ្លាចឆ្លងវីរុសកូរ៉ូណាហ្នឹង»។រថយន្តដែលត្រៀមចាំដឹកអ្នកដំណើរនៅព្រឹកថ្ងៃអាទិត្យនេះ។
រថយន្តដែលត្រៀមចាំដឹកអ្នកដំណើរនៅព្រឹកថ្ងៃអាទិត្យនេះ។ (ស៊ុន ណារិន/VOA)
អ្នកបើករថយន្តម្នាក់ទៀត លោក សុខេម អាយុ៤៥ឆ្នាំ មានប្រសាសន៍ថា លោកក៏ត្រូវបានឲ្យរង់ចាំដឹកអ្នកដំណើរតាំងពីម៉ោង៥ព្រឹកដូចគ្នា។ លោកបន្តថា លោកមានការព្រួយបារម្ភខ្លាំងដូចគ្នា ដោយសារពីមុនគិតថា មិនមានអ្នកផ្ទុកវីរុសនោះទេ។
លោក សុខេម ដែលមានកូនបីនាក់ បានប្រាប់ ថា៖ «ខ្ញុំសូមឲ្យរាជរដ្ឋាភិបាលជួយ ព្រោះពួកខ្ញុំនៅជួរមុខ សូមឲ្យជួយមើលថែ»។សាធារជន និងអ្នកសារព័ត៌មានមិនត្រូវបានអនុញ្ញាតឲ្យចូលសេរី ដូចកាលពីថ្ងៃព្រហស្បតិ៍នោះទេ។
អាជ្ញាធរដែលយាមកាមនៅច្រកចូល បានលើកឡើងថា ភ្ញៀវ និងបុគ្គលិកនាវា មិនត្រូវបានអនុញ្ញាតឲ្យចេញពីកប៉ាល់នោះទេ។រហូតមកដល់ពេលនេះ មិនទាន់មានព័ត៌មានផ្លូវការថាតើក្រុមហ៊ុន Holland America Lane ដែលគ្រប់គ្រងនាវានេះ បានលុបចោលជើងយន្តហោះសម្រាប់ថ្ងៃនេះ ឬយ៉ាងណានោះ។
បើតាមសេចក្តីថ្លែងការណ៍របស់ក្រុមហ៊ុនដែលបង្ហោះនៅលើហ្វេសប៊ុកនៅព្រឹកថ្ងៃអាទិត្យនេះ អ្នកធ្វើដំណើរប្រមាណ ២៣៦នាក់ និងបុគ្គលិកនាវា ៧៤៧នាក់ទៀតកំពុងស្ថិតនៅលើវានានេះ។ ក្រុមហ៊ុន និងក្រសួងសុខាភិបាលកម្ពុជា បានស្នើឲ្យអាជ្ញាធរម៉ាឡេស៊ីធ្វើតេស្តម្តងទៀត ដើម្បីបញ្ជាក់។
នាវានេះមានអ្នកទេសចរណ៍សរុបចំនួន ១៤៥៥នាក់ និងបុគ្គលិកនាវាចំនួន៨០២នាក់។សាធារណជន និងអ្នកសារព័ត៌មានមិនត្រូវបានអនុញ្ញាតអោយចូលសេរីទៅជិតនាវានោះទេ នាព្រឹកថ្ងៃអាទិត្យនេះ។ (ស៊ុន ណារិន/VOA Khmer)
សាធារណជន និងអ្នកសារព័ត៌មានមិនត្រូវបានអនុញ្ញាតអោយចូលសេរីទៅជិតនាវានោះទេ នាព្រឹកថ្ងៃអាទិត្យនេះ។
អ្នកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា បានប្រាប់វីអូអេថា ស្ថានទូតអាមេរិកប្រចាំកម្ពុជាបានដឹងពីសេចក្តីរាយការណ៍ព័ត៌មានខាងលើនេះ ហើយថា «យើងកំពុងសហការជាមួយមន្ត្រីពាក់ព័ន្ធគ្រប់រូប ដើម្បីបញ្ជាក់ឲ្យច្បាស់ពីសេចក្តីរាយការណ៍ទាំងអស់នេះ»។
អ្នកស្រីបានសរសេរតាមសារអេឡិចត្រូនិកមកកាន់វីអូអេថា៖ «សុវត្ថិភាព និងសុខមាលភាពរបស់ពលរដ្ឋអាមេរិកគឺជា អាទិភាពចម្បងរបស់ស្ថានទូតអាមេរិក។ យើងកំពុងធ្វើការសហការយ៉ាងជិតស្និទ្ធជាមួយមន្ត្រីរដ្ឋាភិបាល និងមន្ត្រីសុខាភិបាលកម្ពុជា ក្នុងការចាត់វិធានការផ្នែកត្រួតពិនិត្យសុខភាពបន្ថែមទៀតដែលចាំបាច់»។
គួរបញ្ជាក់ថា ក្នុងចំណោមអ្នកដំណើរជិត ២០០០នាក់ នៅលើនាវា Westerdam នេះ អ្នកដំណើរ២០នាក់ ត្រូវបានរាយការណ៍ថា មានបញ្ហាសុខភាពដូចជា ផ្តាសាយ រាគរូស និងមានបញ្ហាក្រពះ និងពោះវៀនជាដើម។ ក្រសួងសុខាភិបាលកម្ពុជាបានលើកយកវត្ថុសំណាកពីអ្នកដំណើរទាំងនេះទៅពិនិត្យនៅឯវិទ្យាស្ថានប៉ាស្ទ័រ ហើយបានបញ្ជាក់កាលពីយប់ថ្ងៃព្រហស្បតិ៍ថា ពួកគេមិនមានផ្ទុកវីរុសកូរ៉ូណានោះទេ៕ប្រភព VOA
