ហេង សួរ៖ រោងចក្រកាត់ដេរមួយចំនួននៅកម្ពុជា ព្យួរការងារកម្មករ ដោយសារខ្វះក្រណាត់ដេរ មិនមែនមកពីឥទ្ធិពល EBA ទេ
ភ្នំពេញ៖ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានមានប្រសាសន៏នៅក្នុងប្រព័ន្ធតេឡេក្រាមកាលពីម្សិលមិញបានបញ្ជាក់ថា នៅក្នុងខែមីនា ឆ្នាំ២០២០ ខាងមុខនេះអាចនឹងមានរោងចក្រកាត់ដេរមួយចំនួននៅកម្ពុជា ព្យួរការងារកម្មករ ដោយសារខ្វះក្រណាត់ដេរ ពីព្រោះលែងមានការបញ្ជូនក្រណាត់ដែលជាវត្ថុធាតុដើមចេញពីប្រទេសចិនចាប់តាំងពីប្រទេសនេះបានផ្ទុះនូវវីរុសកូរ៉ូណាមកគឺវាមិនមែនមកពីឥទ្ធិពល EBA នោះទេ។
លោកបានបញ្ជាក់ថា រោងចក្រកាត់ដេរសម្លៀកបំពាក់នៅកម្ពុជាដែលដំណើរការកន្លងមក គឺភាគច្រើនពឹងផ្អែកលើការនាំចូលក្រណាត់ដែលជាវត្ថុធាតុដើមពីរោងចក្រនៅក្នុងប្រទេសចិន ប៉ុន្តែចាប់តាំងពីមានការផ្ទុះវីរុសកូរ៉ូណា បន្ទាប់ពីមុនបុណ្យចូលឆ្នាំចិនមកបានធ្វើឱ្យរោងចក្រនៅក្នុងប្រទេសនេះ បិទទ្វារ អញ្ចឹងវាត្រូវតែផ្អាកមួយរយៈ ហើយមិនទាន់ដឹងថាត្រូវដំណើរការវិញនៅពេលណានោះទេ ទើបធ្វើឱ្យរោងចក្រនៅកម្ពុជាអាចប្រឈមនឹងការខ្វះក្រណាត់នាពេលខាងមុខ។
វិបត្តិនៃឧស្សាហកម្មរោងចក្រកាត់ដេរអាចនឹងកើតឡើង ហើយធ្ងន់ធ្ងរដោយសារតែទី១ ភាពមិនច្បាស់លាស់នៃប្រព័ន្ធអនុគ្រោះពន្ធពីអឺរ៉ុប និងទី២ វិបត្តិនៃការឆ្លងរាលដាលនៃវីរុសកូរ៉ូណា ។ ជាការពិតណាស់ រាល់វត្ថុធាតុដើមសម្រាប់បម្រើក្នុងវិស័យឧស្សាហកម្មកាត់ដេរកម្ពុជា ភាគច្រើនត្រូវនាំចូលពីប្រទេសចិន ក្នុងនោះមានប្រមាណ៨០ភាគរយទៅហើយ ដោយឡែកប្រទេសផ្សេងទៀតដូចជា ឥណ្ឌូនេស៊ី និងវៀតណាមជាដើម ក៏ប៉ុន្តែប្រទេសទាំងនោះក៏យកវត្ថុធាតុដើមពីប្រទេសចិនមកផ្គត់ផ្គង់ដូចគ្នា ដូច្នេះបើសិនជាមានការបិទរោងចក្រនៅប្រទេសចិនដោយសារតែបញ្ហាវីរុសកូរ៉ូណា នោះការផ្គត់ផ្គង់ទៅប្រទេសវៀតណាម និងឥណ្ឌូនេស៊ីនឹងខ្វះខាតដូចគ្នាផងដែរ ។ នេះបើតាមការលើកឡើងរបស់លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ)។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានលើកឡើងថាការព្យួរការងារនឹងធ្វើឱ្យកម្មករបាត់បង់ប្រាក់ចំណូល ហើយលោកថា ការដោះស្រាយដើម្បីកុំឱ្យកម្មករត្រូវបាត់បង់ចំណូលនេះ គឺអាចជារឿងដ៏លំបាកមួយសម្រាប់រដ្ឋាភិបាល។
លោកបានបន្តទៀតថា៖ «ស្ថានភាពបែបនេះ រោងចក្រខ្លះមិនអាចទទួលយកកម្មករបន្ថែមឡើយ ប្រសិនបើរោងចក្ររបស់ពួកគាត់ត្រូវបានផ្អាកដោយសារខ្វះវត្ថុធាតុដើមហ្នឹង។ គាត់នឹងមានបញ្ហាហិរញ្ញវត្ថុ ហើយដែលត្រូវមានកាតព្វកិច្ចបង់ធនាគារជាដើមផង។ ជម្រើសមួយដែលធ្វើបាន តែខ្ញុំគិតថា រដ្ឋយើងមិនដើរច្រកហ្នឹងបានទេ គឺផ្ដល់ថវិការបស់រដ្ឋណាមួយ ដើម្បីជួយដោះស្រាយជីវភាពពួកគាត់ នៅពេលដែលរោងចក្រត្រូវបានផ្អាកផលិតកម្មក្នុងរយៈពេលណាមួយ» ៕
