អាមេរិកឈរជាប្រទេសឈរក្នុងលេខរៀងទី១ ក្នុងការនាំចូលផលិតផល កាត់ដេរពីកម្ពុជា
ភ្នំពេញ ៖ ការនាំចេញវិស័យកាត់ដេរ និងសំលៀកបំពាក់ ទៅកាន់ទីផ្សារអាមេរិក មានទំហំទឹកប្រាក់សរុបប្រមាណជាង ៣.៤២៩ លានដុល្លារអាមេរិក ពោលគឺឈរក្នុងលំដាប់ទី១ បន្ទាប់ពីការនាំចេញទៅកាន់ទីផ្សារសហគមន៍អឺរ៉ុប, ជប៉ុន, អង់គ្លេស និងអាស៊ាន ។
ពាក់ព័ន្ធនឹងការធ្វើពាណិជ្ជកម្មក្រៅប្រទេស តាមការបង្ហាញទូរលេខរបស់អគ្គនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា នៅក្នុងឆ្នាំ២០១៩ ការនាំចេញវិស័យសំខាន់ៗ ទៅក្រៅប្រទេសមាន ៖ វិស័យកាត់ដេរ អង្ករ កៅស៊ូ និងផ្សេងៗទៀត ក្នុងនោះការនាំចេញវិស័យកាត់ដេរ និងសំលៀកបំពាក់ ទៅកាន់ទីផ្សារសហរដ្ឋអាមេរិក មានទំហំទឹកប្រាក់ប្រមាណជាង ៣.៤២៩ លានដុល្លារអាមេរិក ខណៈដែលការនាំចេញទៅកាន់ទីផ្សារសហគមន៍អឺរ៉ុប មានទំហំទឹកប្រាក់ ៣.២៤៩ លានដុល្លារ, ការនាំចេញទៅកាន់ទៅអាស៊ាន ជាង ១៨០ លានដុល្លារ, អង់គ្លេស ជាង ៨៩០លានដុល្លារ និងទៅកាន់ទីផ្សារជប៉ុន មានចំនួនជាង ៩៧៥ លានដុល្លារអាមេរិក ។
ក្រៅពីការនាំចេញផលិតផលក្នុងវិស័យកាត់ដេរ កម្ពុជាក៏បាននាំចេញអង្ករទៅកាន់ទីផ្សារសហរដ្ឋអាមេរិក ក្នុងទំហំទឹកប្រាក់ប្រមាណជា ២ លានដុល្លារអាមេរិក រួមជាមួយការនាំចូលផលិតផលផ្សេងៗទៀត មានតម្លៃទឹកប្រាក់ជាង ១ពាន់លានដុល្លារអាមេរិក ផងដែរ ។
សូមបញ្ជាក់ថា ពាក់ព័ន្ធនឹងកំណើនវិស័យឧស្សាហកម្មបើតាមច្បាប់ស្តីពីការគ្រប់គ្រងហិរញ្ញវត្ថុឆ្នាំ២០២០ ត្រូវបានព្យាករណ៍ ថា នឹងមានការថមថយក្នុងអត្រារង្វង់ ៨,៩% នៅក្នុងឆ្នាំ២០២០ និង ១០,៧% នៅឆ្នាំ២០១៩, ក្នុងនោះ ចំពោះកំណើនផ្នែកកាត់ដេរ ក្នុងឆ្នាំ២០១៩ កន្លងមក ស្ថិតក្នុងរង្វង់ ៧,១% តែបើតាមការព្យាកររបស់មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ លើផ្នែកកាត់ដេរ និងសំលៀកបំពាក់ ក្នុងឆ្នាំ២០២០ នេះ នឹងអាចថមថយនៅក្នុងអត្រារង្វង់ ៥% ប៉ុណ្ណោះ ៕
