រដ្ឋបាលខេត្តកោះកុងបានបញ្ជាក់៖ ជនជាតិចិនទាំង ២នាក់ ពុំមានផ្ទុកមេរោគថ្មីកូរ៉ូណានោះទេ ហើយពួកគេត្រឡប់ទៅប្រទេសចិនវិញហើយ

(កោះកុង)៖ រដ្ឋបាលខេត្តកោះកុង បានជូនដំណឹងដល់សាធារណជនទាំងក្នុងប្រទេស និងក្រៅប្រទេសយ៉ាងដូច្នេះថា កន្លងមកមានអ្នកសារព័ត៌មានខ្លះបានចុះផ្សាយថា មានជនជាតិចិន ២នាក់ ឈ្មោះ YIN GONGPING ភេទប្រុស អាយុ ៤៥ឆ្នាំ និងកូន ឈ្មោះ YIN ZHENGYIN ភេទប្រុស អាយុ ១៤ឆ្នាំ មកពីក្រុងវូហាន ខេត្តហ្វីប៉ី (HUPI) នៃសាធារណៈរដ្ឋប្រជាមានិតចិន បានមកស្នាក់នៅកំសាន្ត នៅក្នុងតំបន់វិសមកាលតារាសាគរ ស្រុកគីរីសាគរ ខេត្តកោះកុង ហើយសង្ស័យមានផ្ទុកមេរោគថ្មីកូរ៉ូណា (Corona)។

ប៉ុន្តែតាមការពិនិត្យយ៉ាងយកចិត្តទុកដាក់ពីក្រុមគ្រូពេទ្យជំនាញរួចមក អ្នកទាំងពីរនោះ ពុំមានផ្ទុកមេរោគថ្មីកូរ៉ូណានោះទេ ហើយបច្ចុប្បន្ននេះ ជនជាតិចិនទាំងពីររូបបានធ្វើដំណើរវិលត្រឡប់ទៅប្រទេសចិនវិញហើយ។