លោក ពេជ្រ ស្រស់៖ ជារឿងដ៏ត្រឹមត្រូវបំផុត ដែលក្រសួងមហាផ្ទៃមានចេតនាបែងចែកតួនាទីមន្រ្តីបក្សនយោបាយ និងមន្រ្តីបម្រើរដ្ឋាភិបាល ដើម្បីតម្លាភាពក្នុងវិស័យនយោបាយ និងប្រសិទ្ធភាពការងារថ្នាក់ក្រោមជាតិនៃរដ្ឋាភិបាល
ថ្លែងក្នុងពិធីអបអរខួបលើកទី៤១ នៃទិវាជ័យជម្នះ ៧មករា ដែលធ្វើឡើងនៅខេត្តបាត់ដំបង នាព្រឹកថ្ងៃទី៩មករានេះ សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងឱ្យដឹងថា សម្តេចកំពុងសិក្សាញែកតួនាទីភារកិច្ចក្នុងគណបក្ស ឱ្យនៅដាច់ដោយឡែកពីការងាររដ្ឋាភិបាល។
ក្រោយការថ្លែងរបស់ សម្តេច ស ខេង នេះលោក ពេជ្រស្រស់ ប្រធានគណបក្សយុវជនកម្ពុជា ចេញសារគាំទ្រដែលក្រសួងមហាផ្ទៃមានចេតនាបែងចែកតួនាទីមន្រ្តីបក្សនយោបាយ និងមន្រ្តីបម្រើរដ្ឋាភិបាលថា ” ជារឿងដ៏ត្រឹមត្រូវបំផុត ដែលក្រសួងមហាផ្ទៃមានចេតនាបែងចែកតួនាទីមន្រ្តីបក្សនយោបាយ និងមន្រ្តីបម្រើរដ្ឋាភិបាលដើម្បីធានាបានតម្លាភាពក្នុងវិស័យនយោបាយ និងការបម្រើតួនាទីក្នុងមុខងារសាធាណៈ ដោយសារបច្ចុប្បន្ននេះ មានសាលាឃុំខ្លះរកមេឃុំមិនឃើញទេប៉ុន្តែបើទៅរកនៅទីស្នាក់ការបក្ស គឺ ឃើញមេឃុំនៅទីនោះ ដូច្នេះធ្វើឲ្យពលរដ្ឋមួយចំនួនទើសទាល់ណាស់ពីព្រោះថា ពលរដ្ឋមួយចំនួនមិនមាននិន្នាការខាងបក្សកាន់អំណាចទេក៏ប៉ុន្តែដើរចូលទៅស្នាក់ការបក្សកាន់អំណាច ដើម្បីស្វែងរកមេឃុំ ហើយការបែងចែកតួនាទីឲ្យដាច់ស្រលះបែបនេះគឺជាការកែទំរង់ឲ្យអំណាចមុខងារសារធាណៈស្ថិតក្នុងអំណាចរបស់ពលរដ្ឋ គឺមិនស្ថិតនៅលើអំណាចបក្សទៀតឡើយ។ ” ៕
