១ខែ តម្រូវការប្រើប្រាស់ឈាមនៅទូទាំងប្រទេស មានប្រមាណ៦ពាន់ប្លោក
ភ្នំពេញ៖ ថ្លែងក្នុងយុទ្ធនាការបរិច្ចាគឈាម ដើម្បីសង្គ្រោះជីវិត របស់ធនាគារស្ថាបនាភីអិលស៊ី នាថ្ងៃទី២០ ខែធ្នូ នេះ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានអៈអាងថា ក្នុង១ខែ តម្រូវការប្រើប្រាស់ឈាមនៅទូទាំងប្រទេស មានប្រមាណ៦ពាន់ប្លោក ដើម្បីជួយសង្គ្រោះជីវិតរបស់អ្នកជំងឺ។
លោកវេជ្ជបណ្ឌិត បានលើកឡើងទៀតថា កិច្ចការបរិច្ចាគឈាមដោយស្ម័គ្រចិត្ត នៅមានចំនួនតិចនៅឡើយ ហើយការបរិច្ចាគឈាម រហូតមកដល់ពេលនេះ មានតែ២៥%ប៉ុណ្ណោះ។ ដូច្នេះអ្វីដែលជាកង្វះខាត និងភាពប្រឈមរបស់មជ្ឈមណ្ឌល គឺមានកម្រិតខ្ពស់។ ដើម្បីបង្កើននូវតម្រូវការឈាម មជ្ឈមណ្ឌលតែងតែរកដៃគូសហការ ធ្វើយ៉ាងណាប្រមែប្រមូលឈាមឲ្យបានច្រើន។
ជាមួយគ្នានោះដែរ លោក លឹម អូន នាយកប្រតិបត្តិធនាគារ ស្ថាបនា បានលើកឡើងថា ឆ្នាំនេះ គឺជាការចូលរួមលើកទី១២ របស់ធនាគារស្ថាបនា ដើម្បីជួយសង្គ្រោះ អាយុជីវិតមនុស្សដែលត្រូវការឈាម ចាំបាច់ និងដើម្បីជួយបង្កើនបរិមាណឈាមក្នុងស្តុក របស់មជ្ឈមណ្ឌលជាតិផ្តល់ឈាមសម្រាប់ទុកប្រើប្រាស់ក្នុងការជួយសង្គ្រោះអាយុជីវិតឱ្យបានទាន់ពេលវេលា។
លោកនាយកប្រតិបតិ្ត ក៏បានអំពាវនាវដល់បងប្អូនទាំងអស់ចូលរួមបរិច្ចាគឈាមឲ្យបានទៀងទាត់ទាំងអស់គ្នា ដើម្បីសកម្មភាពសប្បុរសធម៌ និងដើម្បីសុខភាពល្អទាំងអស់គ្នា ៕
