អាជ្ញាធររកវិធីទប់ស្កាត់ការបាក់ច្រាំងទន្លេរ នៅស្រុកចំនួន៣ក្នុងខេត្តកំពង់ចាម
កំពង់ចាម ៖ ដើម្បីរកយុទ្ធ សាស្ត្រធ្វើយ៉ាងណាកុំឲ្យច្រាំង ទន្លេបាក់ច្រើនបន្តទៅទៀត លោក អ៊ុន ចាន់ដា អភិបាលខេត្តនៅថ្ងៃទី ២០ធ្នូ២០១៩ នេះ បានដឹកនាំស្ថាប័នជំនាញ បានចុះពិនិត្យពីគ្រោះមហន្តរាយបាក់ច្រាំងទន្លេនៅក្នុងស្រុកចំនួន៣រួមមានកោះសូទិន ស្រីសន្ធរនិងកងមាស ។
ប្រជាពលរដ្ឋរស់នៅភូមិឬស្សីស្រុក ឃុំឬស្សីស្រុក ស្រុកស្រីសន្ធរ លោកតា ភួង ប៉ូ មានប្រសាសន៍ថា កាលពីដើមឡើយ ច្រាំងទន្លេនៅឆ្ងាយពីផ្ទះគាត់រាប់រយម៉ែត្រប៉ុន្តែដោយសារតែគ្រោះធម្មជាតិមានការប្រែប្រួលក៏ធ្វើអោយច្រាំងទន្លេ បានបន្តបាក់ជារៀងរាល់ឆ្នាំ។ដោយទឹកបានហូរពីអូឡេង បុកមកចំភូមិរបស់គាត់ ទើបជាហេតុប ណ្ដាលឲ្យបាក់ច្រាំងបែបនេះ។
លោកតាបន្តថា មកដល់ឆ្នាំ២០១៩នេះ ច្រាំងទន្លេបានបាក់ច្រើន ដោយនៅសល់ចម្ងាយប្រហែល៥០ម៉ែត្រទៀតប៉ុណ្ណោះ និងដល់ផ្ទះរបស់គាត់។កំពុងតែមានក្តីកង្វល់តើនៅពេលខាងមុខនឹងត្រូវដោះ ស្រាយដោយរបៀបណា។លោកតានិងអ្នកភូមិសំណូមពរដល់អាជ្ញាធរខេត្តនិងស្ថាប័នពាក់ព័ន្ធជួយអន្តរាគមន៍ធ្វើយ៉ាងណាកុំឲ្យច្រាំងទន្លេបាក់បន្តទៀត។
ចំណែកអ្នកស្រីទូច សារឿន រស់នៅភូមិព្រែកកុយ ឃុំព្រែកកុយ ស្រុកកងមាស ប្រាប់ថា គាត់បានសាងសង់ផ្ទះឈើទំហំ៥ម៉ែត្រគុណនឹង១០ម៉ែត្រប្រក់សង្កសី ដោយបានធ្វើនៅជាប់នឹងមាត់ព្រែករយៈពេល ១៦ឆ្នាំហើយ។លុះមកដល់ជិតចុងឆ្នាំ២០១៩ ដោយសារតែទឹកព្រែកហីរចេញមកខ្លាំងចូលទៅក្នុងទន្លេមេគង្គ ជាហេតុធ្វើឲ្យដីមាត់ព្រែកបានបាក់យ៉ាងកំហុក ហើយផ្ទះរបស់គាត់ត្រូវបានអាជ្ញាធរនិងកម្លាំងសមត្ថកិច្ច ចុះមកអន្តរាគមន៍ជួយរុះរើទាន់ពេលវេលា។
បើតាមអាជ្ញាធរស្រុកកងមាសឲ្យដឹងថានៅក្នុងឃុំស្ដៅនិងឃុំព្រែកកុយ លំនៅឋានរបស់ប្រជាពលរដ្ឋចំនួន១៨ខ្នងត្រូវបានអន្តរាគមន៍ចុះរុះរើទាន់ ពេលវេលា។
នាយករងរដ្ឋបាលសាលាខេត្ត លោក សំ ពិសិដ្ឋ បានឲ្យដឹងថា ដោយសារតែឆ្នាំ២០១៨កន្លងទៅពីគ្រោះមហន្តរាយបាក់ច្រាំងទន្លេ ទើប លោកអភិបាលខេត្ត បានដឹកនាំកម្លាំងជំនាញចុះត្រួត ពិនិត្យច្រាំងទន្លេមេគង្គដែលបាក់ក្នុងស្រុកចំនួន៣មានកោះសូទិន ស្រីសន្ធរនិងកងមាស ក្នុងការចុះនេះបានណែនាំដល់អាជ្ញាធរស្រុកនីមួយៗត្រូវធ្វើផ្លូវវាងពីកន្លែងបាក់ច្រាំង ដើម្បីសម្រួលឲ្យប្រជាពលរដ្ឋធ្វើដំណើរឆ្លងកាត់ជាមួយនោះអាជ្ញាធរខេត្តនិងរកវិធីសាស្ត្រ ដើម្បីធ្វើយ៉ាងណានៅក្នុងឆ្នាំខាងមុខនេះការពារមិនឱ្យច្រាំងទន្លេបាក់ច្រើនបែបនេះបន្តទៀត។
សូមបញ្ជាក់ថា ច្រាំងទន្លេនៅឃុំពាមកោះស្នា ស្រុកស្ទឹងត្រង់ដែលបានបាក់ច្រើន ក្រោយពីការយកចិត្តទុកដាក់របស់រដ្ឋមន្ត្រីក្រសួងធនធានទឹកនិងឧតុនិយម ជាមួយនឹងគណៈកម្មការគ្រោះមហន្តរាយថ្នាក់ជាតិ បានរៀបចំបាវខ្សាច់ទុកច្រាំងទន្លេ ទទួលបានជោគជ័យ មិនបាក់បន្ថែមនោះទេហើយកន្លែងខ្លះក៏បានដុះដៅឡើងវិញផងដែរ៕
