ឌុន រយ៉ា ចាប់អាជីពប្រដាល់ដំបូង ព្រោះឃើញគេហាត់ និងឡើងប្រកួតសប្បាយ
ថ្ងៃទី ០៣ ខែមីនា ឆ្នាំ២០១៩ ម៉ោង 07:25PM
អ្នកលេងគុនខ្មែរមកពីបន្ទាយមានជ័យ ឌុន រយ៉ា ថាចូលចាប់អាជីពប្រដាល់នេះដំបូងឡើយ គឺដោយសារតែឃើញគេហាត់សប្បាយ ប្រកួតបានលុយចាយ ទើបចាប់ផ្ដើមចូលហ្វឹកហាត់ជាមួយតា ហើយក៏បន្តដល់សព្វថ្ងៃនេះតែម្ដង។
រយ៉ា បានឲ្យដឹងថា មុនដំបូងខ្លួនហ្វឹកហាត់ជាមួយព្រឹទ្ធាចារ្យប្រដាល់ជើងចាស់ ឌុន សុផូ នៅឯខេត្តបន្ទាយមានជ័យឯណោះទេ តែដោយសារតែលោកតាបានទទួលមរណភាពទៅក៏មកហ្វឹកហាត់ជាមួយលោក អេ ភូថង ជំនួសវិញ។យុវជនវ័យ១៦-១៧ឆ្នាំ រូបនេះបន្ថែមទៀតថា បន្ទាប់ពីហ្វឹកហាត់យូរៗទៅក៏មានចិត្តស្រឡាញ់ ខណៈការប្រកួតតែងតែបានថវិកាផងនោះ ទើបជំរុញអ្នកស្នងគុនខ្មែរខាងលើនេះចាប់ផ្ដើមស្រឡាញ់ និងប្ដេជ្ញាសាងកេរ្តិ៍ឲ្យល្បីនៅពេលខាងមុខ។ កូនសិស្សលោក អេ ភូថង រូបនេះនឹងពង្រឹងសមត្ថភាពបន្ថែមទៀត ដើម្បីល្បីឈ្មោះដូចរៀមច្បង រឿង សោភ័ណ្ឌ ជាដើម។
កីឡាករ ឌុន រយ៉ា ជាកូនសិស្សលោក អេ ភូថង ប្រកួតបាន៣២ដង ឈ្នះ ២២ ចាញ់៩ និងស្មើ១ ប្រកួតចុងក្រោយឈ្នះកីឡាករ លី លន់ កាលពីថ្ងៃសៅរ៍ ទី៣០ ខែមីនា ឆ្នាំ២០១៩ នៅសង្វៀន TV5 កន្លងទៅសប្ដាហ៍មុននេះ៕
អត្ថបទ៖ ពេជ្រ គឹមស្រ៊ិន
