ក្រុមស្ទាវប្រដាប់ដោយកាំភ្លើង ដេញប្រហារយុវជន២នាក់ បណ្ដាលឲ្យស្លាប់យុវជនម្នាក់ក្នុងថ្លុកឈាម ម្នាក់ទៀតបាក់ដៃបាក់ជើងបែកមុខខ្ទេច

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញក្រុមក្មេងស្ទាវជាច្រើននាក់ ដែលជាជនដៃដល់ ជិះម៉ូតូ៤ទៅ៥គ្រឿង ដេញតាមវាយយុវជន២នាក់ មិនទាន់ស្គាល់អត្តសញ្ញាណ ដែលកំពុងជិះម៉ូតូតាមដងផ្លូវ យ៉ាងប្រសាចពេញផ្លូវ ក្នុងល្បឿនលឿនដូចហោះពីត្បូងទៅជើង ពេលនោះគេបានលឺសំឡេងជនរងគ្រោះទាំង២នាក់ស្រែកឲ្យគេឯងជួយផង ដោយស្រែកបន្ថែមថា ចោរៗ លុះដល់ចំណុចកើតហេតុ ក៏ព្យាយាមបត់ទៅវិញ ទើបបណ្តាលឲ្យដួលម៉ូតូ រួចត្រូវក្រុមជនដៃដល់វាយប្រហារ រហូតស្លាប់ម្នាក់ ក្នុងថ្លុកឈាមយ៉ាងរន្ធត់ និងម្នាក់ទៀតរងរបួសធ្ងន់ស្ទើរក្ស័យជីវា និងបានរកឃើញកាំភ្លើងខ្លីមួយដើម ម៉ាកK59 ធ្លាក់លើផ្លូវនៅទីតាំងកើតហេតុ និងមានម៉ូតូម៉ាក Beat ពណ៌សលាយក្រហម ពាក់ស្លាកលេខ ពោធិ៍សាត់ 1I-8728 ។ ចំណែកជនដៃដល់ ក្រោយប្រហារជនរងគ្រោះហើយនោះ បានរត់គេចខ្លួនបាត់អស់គ្មានសល់ ។