តម្លៃស្រូវឡើងថ្លៃបន្តិច ហើយអាទិត្យក្រោយ ក្រោយសម្តេចតេជោបញ្ជាអោយរដ្ឋមន្ត្រីក្រសួងសេដ្ឋកិច្ច និងក្រសួងពាណិជ្ជកម្
(ភ្នំពេញ)៖ បន្ទាប់ពីសម្តេចតេជោ បញ្ជាអោយរដ្ឋមន្ត្រីក្រសួងសេដ្ឋកិច្ច និងក្រសួងពាណិជ្ជកម្ម ធ្វើការរួមគ្នា ជួយកសិករ ក្នុងការទប់ស្កាត់នូវការធ្លាក់ចុះនៃតម្លៃស្រូវ នៅពេលបច្ចុប្បន្ន នៅល្ងាចថ្ងៃទី១១ ខែធ្នូ នេះតម្លៃស្រូវសែនក្រអូប បានឡើងថ្លៃបន្តិចចន្លោះពី ៩៦០ រៀល ទៅ ១០០០ រៀល ក្នុង ១គីឡូក្រាម ( ស្រូវអត់មានជំងឺ )។ រីឯស្រូវជំងឺបានតម្លៃ ៩០០-៩៤០ រៀលក្នុង១គីឡូក្រាម
ប្រធានសហព័ន្ធស្រូវអង្ករកម្ពុជា បានជម្រាបជូនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។
ក្នុងសារឆ្លងឆ្លើយរវាងប្រធានសហព័ន្ធស្រូវអង្ករកម្ពុជា លោកឧកញ៉ា សុង សារ៉ន និងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលគេបានផ្សព្វផ្សាយតាមក្រុមតេឡេក្រាម នៅព្រលប់ថ្ងៃទី១១ ខែធ្នូ ឆ្នាំ២០១៩ លោកឧកញ៉ា សុង សារ៉ន ជម្រាបជូនឯកឧត្តមរដ្ឋមន្ត្រីថា «ថ្ងៃនេះ តម្លៃស្រូវសែនក្រអូប បានឡើងថ្លៃបន្តិច ចន្លោះពី ៩៦០-១០០០ រៀល ស្រូវអត់មានជំងឺ។ ស្រូវជំងឺ បានតម្លៃ ៩០០-៩៤០ រៀល»។
ឆ្លើយតបនឹងប្រធានសហព័ន្ធស្រូវអង្ករ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់លោក សារ៉ន ដោយសង្ឃឹមថា សម្ព័ន្ធស្រូវអង្ករ នឹងខិតខំប្រឹងប្រែងអនុវត្តនូវអនុសាសន៍របស់សម្តេចតេជោ នាយករដ្ឋមន្ត្រី ហ៊ុន សែន នៅពេលព្រឹកមិញនេះ។
លោកឧកញ៉ា សុង សារ៉ន អគ្គនាយកក្រុមហ៊ុន Amru Rice ដែលបានជាប់ឆ្នោត ជាប្រធានសហព័ន្ធស្រូវអង្ករកម្ពុជា ក្នុងអាណត្តិទី៣ ជំនួសលោក សុខ ពុទ្ធិវុធ ក៏បានជម្រាបជូនឯកឧត្តមរដ្ឋមន្ត្រីកសិកម្មថា សហព័ន្ធស្រូវអង្ករ ខិតខំបង្រួបបង្រួមសមាជិកឲ្យជួយកសិករ ស្របតាមអនុសាសន៍របស់សម្តេច។ យើងខិតខំឲ្យតម្លៃស្រូវអាទិត្យក្រោយ មានលំនឹងពីចន្លោះ ១០០០-១០៥០ រៀល ក្នុង ១គីឡូក្រាម៕
