ប្រធានមន្ទីរកសិកម្មខេត្ត ៖ ត្រីប្រហុកខ្នើតត្រូវច្រើននៅក្នុងស្រុកកំពង់ត្រឡាច តែថ្លៃបន្តិច
កំពង់ឆ្នាំង ៖ ត្រីធ្វើប្រហុក ផ្អក ២ , ៣ ថ្ងៃមុន បានត្រូវច្រើន នៅក្នុងស្រុកកំពង់ត្រឡាច តែតម្លៃនៅថ្លៃគឺក្នុង១គីឡូ ថ្លៃពី១៣០០រៀល ទៅ១៥០០រៀល ហើយនៅខ្នើតខែក្រោយ អាចនឹងសំបូរម្តងទៀត ដែលប្រជាពលរដ្ឋ អាចនឹងត្រៀម ធ្វើប្រហុកផ្អកទុកហូបបាន។ នេះបើយោងតាមលោក ហិន ហ៊ុន ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តកំពង់ឆ្នាំង។
បើតាមប្រធានមន្ទីររូបនេះ បានឲ្យដឹងថា នៅក្នុងរដូវនេសាទឆ្នាំ២០១៩-២០២០នេះ បន្ទាប់ពីបានតាមដានលើកម្ពស់ទឹក ដែលហូរចេញពីបឹងទន្លេសាបឃើញថា ទឹកបានស្រកចុះយ៉ាងលឿន ដែលមិនធ្លាប់ជួបប្រទះ ក្នុងរយៈកាលកន្លងមក។ នៅក្នុងចុងខ្នើតខែមិគសិរ ខាងមុខនេះប្រសិនបើផ្ទៃមេឃស្រឡះល្អ និងគ្មានភ្លៀងកក់ខែត្រីប្រហុកអាចនឹងម្តងទៀត។
ចំពោះស្ថានភាព ខាងលើនេះ បងប្អូនប្រជាពលរដ្ឋ ដែលមានបំណងធ្វើប្រហុក ផ្អក ត្រី ឆ្អើរសម្រាប់ទុកបរិភោគប្រចាំឆ្នាំ មេត្តាអញ្ជើញមកទិញត្រី ក្នុងខែមិគសិរនេះ ឲ្យបានរួសរាន់ ដូចបានជម្រាបជូនខាងលើ។ នេះបើតាមការបញ្ជាក់របស់លោកហិន ហ៊ុន ។
ជាមួយគ្នានេះដែរ មន្ទីរកសិកម្ម សំណូមពរដល់អាជ្ញាធរមូលដ្ឋាន សមត្ថកិច្ចគ្រប់ជាន់ថ្នាក់មេត្តា ជួយបង្កលក្ខណៈងាយស្រួលជូនដល់ប្រជាពលរដ្ឋ បានធ្វើដំណើរទៅមក ស្នាក់នៅនិងដឹកជញ្ជូនដឹកត្រីប្រហុកទៅកាន់លំនៅឋានដោយអនុគ្រោះផងចុះ៕
