ឯកអគ្គរដ្ឋទូតថ្មី នៃប្រទេសស៊ុយអ៊ែត ប្តេជ្ញាក្នុង ការជំរុញ និងបង្កើនទំនាក់ទំនងជាមួយកម្ពុជាបន្ថែមទៀត ព្រមទាំងជួយកម្ពុជាលើវិស័យអាទិភាពសំខាន់ៗ
(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានអនុញ្ញាត ឲ្យឯកឧត្តម Bjorn Haggmark ឯកអគ្គរដ្ឋទូតថ្មី នៃប្រទេសស៊ុយអ៊ែត ចូលជួបសំដែងការគួរសម។
លោក អ៊ាង សុផល្លែត ជំនួយការសម្ដេចតេជោ បើឱ្យដឹងថា ក្នុងជំនួបនោះ ឯកឧត្តម Bjorn Haggmark បានជម្រាបជូនសម្ដេចតេជោថា ឯកឧត្តមពិតជាមានកិត្តិយសណាស់ដែលបានមកបំពេញបេសកកម្មជាឯកអគ្គរដ្ឋទូត ប្រចាំនៅព្រះរាជាណាចក្រកម្ពុជា។ ឯកឧត្តមបាន មានប្រសាសន៍ថា ឯកឧត្តម បានស្វែងយល់អំពីសោកនាដកម្មរបស់កម្ពុជាកន្លងមក ដែលសោកនាដកម្មទាំងនោះគួរគប្បីណា ទប់ស្កាត់កុំឲ្យមានការវិលត្រឡប់មកវិញ។ ក្នុងន័យនេះឯកឧត្តមបានមានប្រសាសន៍ថា ប្រទេសស៊ុយអែតបានចូលរួមចំណែកយ៉ាងសកម្មក្នុងការជួយដល់តុលាការកាត់ទោសមេដឹកនាំកំពូលរបស់ខ្មែរក្រហមកន្លងមក ហើយឯកឧត្តម ក៏បានមានប្រសាសន៍ដែរថា កន្លងមកស៊ុយអែតក៏បានផ្ដល់ជំនួយមកកម្ពុជាយើងជាដំបូងតាមរយៈជំនួយមនុស្សធម៌ហើយនៅពេលនេះទៀតក៏កំពុងតែរួមចំណែកជួយដល់កម្ពុជានៅក្នុងការអភិវឌ្ឍកម្ពុជាផងដែរ។ ក្នុងន័យនេះឯកឧត្តមបានមានប្រសាសន៍ថា តាមរយៈអ្វីដែលបានធ្វើកន្លងមកនេះ បេសកកម្មកាទូតរបស់ឯកឧត្តមមកកាន់កម្ពុជា ឯកឧត្តមនឹងមិនចំណាយពេលទៅលើអ្វីផ្សេងទៀតទេ ក្រៅពីការជំរុញទំនាក់ទំនងដែលមានស្រាប់ និងពង្រីកទំនាក់ទំនងដែលមាន ជាពិសេសពង្រីកទំនាក់ទំនងទៅលើបញ្ហាសកល ដូចជាបញ្ហាប្រែប្រួលអាកាសធាតុ ក៏ដូចជាបញ្ហាសកលភាវូបនីយកម្មផងដែរ។
ជាការឆ្លើយតប សម្ដេចតេជោបានសំដែងនូវការស្វាគមន៍ និងអបអរសាទរជូនចំពោះឯកឧត្តម Bjorn Haggmark ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៅប្រជាណាចក្រកម្ពុជា។ សម្ដេចបានថ្លែងអំណរគុណជូនដល់ប្រជាជន រដ្ឋាភិបាលស៊ុយអ៊ែត ដែលកន្លងមកតែងតែ ជួយដល់កម្ពុជា ទាំងផ្នែកមនុស្សធម៌ទាំងការអភិវឌ្ឍន៍ ។ សម្ដេចតេជោបានលើកឡើងថាជាការពិតកម្ពុជាទទួលរកនូវសោកនាដកម្មអតីតកាលហើយប្រទេសស៊ុយអែតជាប្រទេសមួយដែលមិនទទួលអតីតខ្មែរក្រហមអង្គុយនៅកៅអីអង្គការសហប្រជាជាតិ ហើយលើសពីនោះទៀតក៏បានអនុញ្ញាតឲ្យកម្ពុជាបើកការិយាល័យព័ត៌មាននៅទីក្រុងស្តុកហូម ហើយចាប់ពីពេលនោះមកប្រទេសស៊ុយអែតជាប្រទេសមួយ ដែលចាប់ផ្ដើមផ្ដល់នូវជំនួយមនុស្សធម៌ដល់កម្ពុជា ។
សម្ដេចតេជោ ក៏បានថ្លែងអំណរគុណផងដែរជូនចំពោះជំនួយរបស់ប្រទេសស៊ុយអែត និងរដ្ឋាភិបាលស៊ុយអែត ក្នុងការកាត់ទោសមេដឹកនាំកំពូលរបស់ខ្មែរក្រហម គឺជាការជួយដល់កម្ពុជាក្នុងការស្វែងរកសច្ចធម៌ពិតរបស់កម្ពុជា ហើយកន្លងមកនេះក៏បានបន្តជួយដល់កម្ពុជាយើងលើវិស័យអភិវឌ្ឍដែរ។ សម្ដេចតេជោ បានមានប្រសាសន៍ផងដែរថា ក្រៅពីកិច្ចសហប្រតិបត្តិការ និងជំនួយលើឆាកអន្តរជាតិដូចជាបញ្ហាប្រែប្រួលអាកាសធាតុ ក៏ដូចជាបញ្ហាសាកលភាវូបនីយកម្ម។ សម្ដេចតេជោ
បានស្នើឲ្យឯកឧត្តម ពិនិត្យពិចារណាស្វែងរកជាមួយភាគីកម្ពុជាលើវិស័យដទៃទៀត ដែលយើងអាចសហការនេះបាន ។ សម្ដេចឆ្លៀតឱកាសនេះដែរ ក៏បានជម្រាបជូន ឯកឧត្តម Bjorn Haggmark អំពីអាទិភាពរបស់រាជាណាចក្រកម្ពុជា នោះគឺកត្តាសុខសន្តិភាព និងស្ថេរភាព ដែលជាកត្តាសំខាន់សម្រាប់ជំរុញការអភិវឌ្ឍរបស់កម្ពុជា ហើយក៏បានជម្រាបជូនផងដែរ នូវមហិច្ឆតារបស់កម្ពុជា នោះគឺកែប្រែប្រទេសកម្ពុជាយើងពីប្រទេស ដែលមានប្រាក់ចំណូលមធ្យមកម្រិតទាប ទៅជាប្រទេសចំណូលមធ្យម កម្រិតខ្ពស់នៅឆ្នាំ២០៣០ខាងមុខ៕
