Higuain ប្រាប់លោក Sarri ថានៅលីគអង់គ្លេសពិបាកណាស់
ថ្ងៃទី ០៣ ខែមេសា ឆ្នាំ ២០១៩ ម៉ោង 8:45AM
ស្របពេលដែល Gonzalo Higuain ហាក់មិនទាន់បានបង្ហាញភាពលេចធ្លោនៅទឺកដីអង់គ្លេសនោះ អ្នកចាត់ការក្លឹបតោខៀវលោក Sarri បាននិយាយបង្ហើបឲ្យដឹងនូវអ្វីដែលខ្សែប្រយុទ្ធរូបនេះធ្លាប់បានប្រាប់គាត់។
កីឡាករសញ្ជាតិអាហ្សង់ទីនរូបនេះបានចូលរួមជាមួយក្លឹបតោខៀវ ក្នុងកុងត្រាខ្ចីជើងពីក្លឹប Juventus កាលពីខែមករា កន្លងទៅ សម្រាប់រយ:ពេលដែលនៅសេសសល់ក្នុងរដូវកាល ២០១៨/១៩ នេះ ជាមួយនឹងលក្ខខណ្ឌទិញផ្តាច់នៅរដូវកាលក្រោយ។
ទោះជាយ៉ាងនេះក្តី វាហាក់មិនរលូននោះទេសម្រាប់កីឡាករវ័យ ៣១ឆ្នាំរូបនេះ ដែលទើបតែរកបាន ៣គ្រាប់ពីការបង្ហាញខ្លួន ១១ លើកសម្រាប់គ្រប់កម្មវិធីប្រកួតទាំងអស់ ហើយដែលធ្វើឲ្យលោក Sarri និយាយពីអ្វីដែលកីឡាកររូបនេះធ្លាប់ប្រាប់គាត់។
” Higuain ប្រាប់ខ្ញុំថា វាពិតជាពិបាកណាស់ ព្រោះថាកម្លាំងបុករបស់ខ្សែការពារនៅអង់គ្លេសនេះពិតជាខ្លាំងណាស់។”
” អាជ្ញាកណ្តាលនៅទីនេះពិតជាខុសគ្នាខ្លាំងណាស់ពីនៅអុីតាលី ដែលវាដូចជាពិភពបាល់ទាត់ផ្សេងទៀតសម្រាប់រូបគេ” ។
” ខ្ញុំគិតថាគេត្រូវការពេលស៊ាំសិន តែយើងគ្មានពេលច្រើនសម្រាប់គេទេ គឺយើងត្រូវការឲ្យគេបង្ហាញនូវទម្រង់លេងល្អបំផុតសម្រាប់រយ:ពេលនៅសេសសល់ ២ ខែទៀតនេះ” ។
យើងមិនអាចដឹងថា Higuain អាចនឹងមានវាសនានៅទីនេះទៀត ឬ យ៉ាងណាទេពេលកុងត្រាខ្ចីជើងចប់ទៅនោះ៕
អត្ថបទ ៖ ពេជ្រ គឹមស្រ៊ិន
