ចេញពីច្រៀងខារ៉ាអូខេ ស្រាប់តែមានក្រុមជនសង្ស័យ៤នាក់ ហើយយកខ្សែក្រវ៉ាត់វាយ និងយកកាំបិតចាក់ទៅលើជនរងគ្រោះ
(កណ្ដាល)៖ ជនសង្ស័យម្នាក់ ក្នុងចំណោមបក្ខពួក៤នាក់ ត្រូវបានសមត្ថកិច្ចនគរបាលស្រុកលើកដែក ធ្វើការឃាត់ខ្លួន ក្នុងករណីហិង្សាដោយចេតនា កាលពីវេលាម៉ោង២និង៣០នាទី ថ្ងៃទី៦ ខែវិច្ឆិកា ឆ្នាំ២០១៩ ត្រង់ចំណុចផ្លូវចូលហាង ខារ៉ាអូខេយីហោ អ័រគីដេ ស្ថិតក្នុងភូមិក្អមសំណរក្រោម ឃុំក្អមសំណរ ស្រុកលើកដែក ។
មន្ត្រីនគរបាលស្រុកលើកដែកបានឲ្យដឹងថា ជនសង្ស័យមានគ្នាសរុប៤នាក់ ចាប់ខ្លួនបានម្នាក់ឈ្មោះ ធឿន ផាន់ណា ភេទប្រុស អាយុ២៨ឆ្នាំ ជនជាតិខ្មែរ មុខរបរចុងភៅ ។ ចំណែកជនសង្ស័យ៣នាក់ទៀតរត់គេចខ្លួនទី១-ឈ្មោះ ម៉ូ ភ័ស ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិត ទី២-ឈ្មោះ ឆាប ធានិត ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិត និងទី៣-ឈ្មោះ ឆាប ធានេត ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិត ។ ចំណែកជនរងគ្រោះឈ្មោះ ជា សុវណ្ណបញ្ញា ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្ស ។ ក្រុមជនសង្ស័យ និងជនរងគ្រោះមានទីលំនៅភូមិ/ឃុំកើតហេតុ ។ ដោយឡែកវត្ថុតាងដកហូតបានមាន៖ អាវយឺតដៃខ្លី ពណ៌សរ មានបោះពុម្ពរូបនាគអក្សខាងមុខសរសេរថា GIVENCHY-PARIS មានស្នាមធ្លុះខាងក្រោយពីរកន្លែងប៉ុនម្រាមដៃ និងខ្សែរក្រវ៉ាត់សរសៃអំបោះក្បាលដែកចំនួន ១ផងដែរ ។
ប្រភពដដែលបន្ដថា នៅមុនពេលកើតហេតុ ជនរងគ្រោះបានផឹកស៊ីច្រៀងនៅហាងខារ៉ាអូខេយីហោ អ័រគីដេរ មកដល់វេលាម៉ោង២និង៣០នាទី ជនរងគ្រោះបានចេញពីច្រៀងវិញ ត្រឡប់មកផ្ទះ ខណៈជិះម៉ូតូចេញបានប្រហែល១០០ម៉ែត្រជិតដល់ថ្នល់លេខ១៤ ស្រាប់តែមានក្រុមជនសង្ស័យ៤នាក់ខាងលើ បានស្ទាក់ផ្លូវជនរងគ្រោះ ហើយយកខ្សែក្រវ៉ាត់វាយ និងយកកាំបិតចាក់ទៅលើជនរងគ្រោះ បណ្តាលឲ្យមានរបួសស្នាម ។ ក្រោយពីធ្វើសកម្មភាពរួច ក្រុមជនសង្ស័យក៏មានគ្នារត់គេចខ្លួនបាត់ទៅ ។ ចំណែកឯជនរងគ្រោះ ត្រូវបានបងប្អូនសាច់ញាតិ យកទៅសង្រ្គោះព្យាបាលនៅប្រទេសវៀតណាម ។
ក្រោយពីសមត្ថកិច្ចទទួលបានព័ត៌មានខាងលើនេះរួច ភ្លាមនោះកម្លាំងនគរបាលជំនាញស្រុក សហការជាមួយកម្លាំងនគរបាលប៉ុស្ដិ៍រដ្ឋបាល បានចុះទៅដល់កន្លែងកើតហេតុ រួចធ្វើការពិនិត្យ និងកសាងសំណុំរឿង ស្រាវជ្រាវ រហូតមកដល់ម៉ោង១៣និង៤០នាទី ថ្ងែខែឆ្នាំដដែល ក៏បានធ្វើការឃាត់ខ្លួនជនសង្ស័យបានម្នាក់ក្នុងចំណោម៤នាក់ ហើយបានបញ្ជូនមកកាន់អធិការដ្ឋានដើម្បីបន្តចាត់ការតាមនិតិវិធី ។ ចំណែកជនសង្ស័យ៣នាក់ទៀត ដែលរត់គេចខ្លួន ត្រូវបានសមត្ថកិច្ចកសាងសំណុំរឿងស្រាវជ្រាវដើម្បីស្វែងរកចាប់ខ្លួនចាត់ការបន្ដទៀត ៕
ប្រភព៖ អគ្គស្នងការដ្ឋាននគរបាលជាតិ
