សម្តេចតេជោ បញ្ជាឲ្យក្រសួងរ៉ែ និងថាមពល ធ្វើឲ្យបាននូវការផលិតអគ្គិសនីពីសំរាម
(ភ្នំពេញ)៖ ថ្លែងក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៥ ខែតុលា ឆ្នាំ២០១៩ សម្តេចតេជោ ហ៊ុន សែន បានប្រកាសប្រគល់ជូនក្រសួងរ៉ែ និងថាមពល ដើម្បីសិក្សារៀបចំលក្ខខណ្ឌ សម្រាប់ឈានទៅធ្វើការដេញថ្លៃ រកដៃគូឯកជន សម្រាប់សាងសង់ និងដំណើរការរោងចក្រអគ្គិសនី ដុតសំរាម នៅទីលានចាក់សំរាម រាជធានីភ្នំពេញ ដោយហាមឃាត់ការនាំចូលសំរាម ពីបរទេស។
មានក្រុមហ៊ុនច្រើនហើយ ដែលបានសិក្សាលើការកែច្នៃសំរាម ជាអគ្គិសនី។ តែពាក់ព័ន្ធនឹងបញ្ហាថ្លៃ។ ក្នុងបញ្ហានេះ សម្តេចតេជោ បានបញ្ជាក់ជាថ្មីថា រាជរដ្ឋាភិបាល អាចបង្កើតឲ្យមានការរៀបចំបែបណាមួយ ហើយថ្លៃបែបណាមួយ ដែលយើងអាចបំពេញខាត ដោយយកប្រាក់ចំណេញពីអគ្គិសនីនេះ មកបំពេញខាតលើការផលិតអគ្គិសនី ដោយប្រើបប្រាស់សំរាមនេះ។ នេះជាការបញ្ជាក់របស់សម្តេចតេជោ ហ៊ុន សែន ។
សម្តេចតេជោ ហ៊ុន សែន បានបញ្ជាក់ថា ការគិតគូរ ឲ្យមានរោងចក្រផលិតអគ្គិសនី ប្រើប្រាស់ដោយសំរាមនេះ ដើម្បីកុំឲ្យប្រទេសយើង ក្លាយជាប្រទេស ដែលមានការកប់ដោយសំរាម នៅគ្រប់ទីកន្លែង នៅពេលអនាគត។ ប៉ុន្តែហាមដាច់ខាតនូវការស្នើសុំវិនិយោគអគ្គិសនី ដុតដោយសំរាម ហើយបើខ្វះ នាំចូលពីបរទេស។ កម្ពុជា មិនមែនជាទីកន្លែងចាក់ចោលសំរាម ឬយកសំរាមមកដុត ដើម្បីផលិតអគ្គិសនីនោះទេ៕
