រថយន្តTACOMA បើកបុកស្លាប់បុរស៣នាក់ នៅតាមបណ្ដោយផ្លូវជាតិលេខ៦A នៅខណ្ឌជ្រោយចង្វារ
(ភ្នំពេញ)៖ យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញបុរសទាំង៣ខាងលើ បានជិះម៉ូតូមួយគ្រឿង ម៉ាក SUZUKI NEX ពណ៌ក្រហមលាយស ពាក់ស្លាកលេខភ្នំពេញ 1CD-1056 ធ្វើដំណើរតាមបណ្ដោយផ្លូវជាតិលេខ៦A ស្របទិសដៅរថយន្ត ភ្លាមនោះក៏ស្រាប់តែមានរថយន្តម៉ាក TOYOTA TACOMA ពណ៌ស ពាក់ស្លាកលេខភ្នំពេញ 2D-9447 បើកបរដោយបុរសម្នាក់បោះពួយយ៉ាងលឿន ខណៈដែលមេឃកំពុងភ្លៀងក៏ជ្រុលទៅបុកចំម៉ូតូពេញមួយទំហឹងបណ្ដាលឲ្យអូសជាង១០០ម៉ែត្រ ជាប់បុរស២នាក់ក្រោមរថយន្ត និងម្នាក់ទៀតខ្ទាតចេញពីរថយន្ដស្លាប់យ៉ាងអាណោចអាធ័ម។ 
ភ្លាមនោះដែរអ្នកបើករថយន្តបង្កមិនបានឈប់ដោះស្រាយទេ បែរជាចុះរត់គេចខ្លួន តែត្រូវបានសមត្ថកិច្ច និងប្រជាពលរដ្ឋនៅក្បែរនោះរត់ដេញតាមឃាត់បាននិងបញ្ជូនទៅអធិការខណ្ឌផងដែរ។
ក្រោយកើតហេតុ សពជនរងគ្រោះទាំង៣នាក់ ត្រូវបានដឹកយកទៅតម្កល់នៅវត្តទឹកថ្លា ដើម្បីស្វែងរកសាច់ញាតិ៕
