បុរសជនជាតិចិនម្នាក់ បើករថយន្តស៊េរីទំនើបដឹកស្រីស្អាតពីរនាក់ ទៅបុករបាំងថ្មចែកទ្រូងផ្លូវ បណ្ដាលឲ្យនារីម្នាក់រងរបួស
(ភ្នំពេញ)៖ បុរសជនជាតិចិនម្នាក់ បើករថយន្តលឿនដូចហោះ បុករបាំងថ្មចែកទ្រូងផ្លូវបណ្ដាលឲ្យនារីម្នាក់រងរបួស។ហេតុការណ៍នេះ បានកើតឡើងនៅវេលាម៉ោងជាង៤ទៀបភ្លឺ ថ្ងៃទី១៣ ខែតុលា ឆ្នាំ២០១៩ ស្ថិតនៅតាមបណ្ដោយផ្លូវព្រះមុនីវង្ស ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។
ប្រភពព័ត៌មានបានឲ្យដឹងថា នៅមុនពេលកើតហេតុគេឃើញមាននារីរូបស្រស់ពីរនាក់ បានរួមដំណើរជាមួយបុរសជនជាតិចិនម្នាក់ ជាអ្នកបើករថយន្តស៊េរីទំនើបមួយគ្រឿងម៉ាក MERCEDES GL450 ពណ៌ខ្មៅ ពាក់ស្លាកលេខ ភ្នំពេញ 2H-9889 ដោយធ្វើដំណើរតាមបណ្ដោយផ្លូវព្រះមុនីវង្ស លុះមកដល់ចំណុចស្តុបប្រាសាទពេជ្រ ដោយរថយន្តលឿនពេកក៏ជ្រុលបុករបាំងថ្មទ្រូងផ្លូវចំពេញទំហឹង បណ្ដាលឲ្យរថយន្តរងការខូចខាតខ្ទេចមួយកំណាត់មុខយ៉ាងដំណំ និងរបាំងថ្មរងការខូចខាតពីរផ្ទាំងផងដែរ។ ចំណែកឯនារីម្នាក់បានរងរបួសត្រូវចំជើង ត្រូវបានដឹកតាមរ៉ឺម៉កម៉ូតកង់បី ទៅមន្ទីរពេទ្យភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋាន បានចុះមកដល់រួចធ្វើការទាក់ទង ទៅសមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងស្ទូចយករថយន្តខាងលើទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំដោះស្រាយទៅតាមផ្លូវច្បាប់ នៅពេលក្រោយ។
