អាជ្ញាធរជាតិអប្សរា៖ រដ្ឋមន្រ្តីបរិស្ថានអាស៊ាននឹងចូលរួមពិធីដាំកូនឈើនៅសួនច្បារមុខប្រាសាទអង្គរវត្ត

(ភ្នំពេញ)៖ រដ្ឋមន្រ្តីបរិស្ថានអាស៊ាន និងកិច្ចប្រជុំពាក់ព័ន្ធលើកទី១៥ ដែលប្រារព្វនៅខេត្តសៀមរាប ចាប់ពីថ្ងៃទី០៧-១០ ខែតុលា ឆ្នាំ២០១៩ ខាងមុខនេះ រដ្ឋមន្រ្តីបរិស្ថានអាស៊ាននឹងចូលរួមពិធីដាំកូនឈើជានិមិត្តរូបនៅសួនច្បារមុខប្រាសាទអង្គរវត្ត, ។

អាជ្ញាធរជាតិអប្សរា បានអោយដឹងថា ដើម្បីត្រៀមទទួលកិច្ចប្រជុំនេះឱ្យបានល្អ ក្រុមការងាររបស់អាជ្ញាធរជាតិអប្សរា ដឹកនាំដោយលោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានចុះកាត់ក្រីដើមឈើមានហានីភ័យ សម្អាត និងលាងផ្លូវសំខាន់ៗមួយចំនួននៅរមណីយដ្ឋានអង្គរ ក្នុងបំណងដើម្បីលើកសោភ័ណភាពបរិស្ថាន។

ផ្លូវសំខាន់ៗដែលក្រុមការងាររបស់អាជ្ញាធរជាតិអប្សរា ចុះប្រតិបត្តិការ រួមមាន៖ ផ្លូវពីព្រលានយន្តហោះទៅអង្គរវត្ត ផ្លូវហ្សាលដឺហ្គោល (ពីសាលាអន្ដរជាតិអាយអូអេសទៅអង្គរវត្ត) ផ្លូវពីប្រាសាទអង្គរវត្តទៅប្រាសាទបាយ័ន និងពីបាយ័នទៅព្រះលានជល់ដំរីជាដើម។ល។

គួរបញ្ជាក់ថា ក្នុងកិច្ចប្រជុំលើកទី១៥ រដ្ឋមន្រ្តីបរិស្ថានអាស៊ាន និងអាស៊ានបូក៣ (ចិន ជប៉ុន និងកូរ៉េ) នេះដែរ រដ្ឋមន្រ្តីបរិស្ថានអាស៊ាននឹងចូលរួមពិធីដាំកូនឈើជានិមិត្តរូបនៅសួនច្បារមុខប្រាសាទអង្គរវត្ត ដែលសួនច្បារនេះត្រូវបានអាជ្ញាធរជាតិអប្សរា រួមជាមួយក្រសួងបរិស្ថានបានរៀបចំនិងកែលម្អ ដើម្បីលើកតម្លៃអង្គរឱ្យសាកសមជារមណីយដ្ឋានបេតិកភណ្ឌពិភពលោក៕

អត្ថបទ៖ សុខ លាភ