លោកអាត់ ធន់ សុំឲ្យលោក ឈាង វុន បង្ហាញភស្តុតាងដែលចោទកម្មករធ្វើពុតឈឺ កឹបកេងលុយប.ស.ស
ភ្នំពេញ៖ ប្រតិកម្មទៅនឹងការលើកឡើងរបស់លោក ឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ព័ត៌មាន និងប្រព័ន្ធផ្សព្វផ្សាយនៃរដ្ឋសភា ដែលបានចោទថា កម្មករធ្វើពុតជាឈឺ ដើម្បីកេងបន្លំប្រាក់ ប.ស.ស ដែលធ្វើឲ្យបាត់បង់ប្រាក់ចំណូលរដ្ឋ លោក អាត់ ធន់ ស្នើអោយលោកឈាង វុន បង្ហាញភស្តុតាងដែលចោទកម្មករធ្វើពុតឈឺ កឹបកេងលុយប.ស.ស។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) ថ្លែងប្រាប់អង្គភាព fastnewsdaily តាមទូរសព្ទ័នៅព្រឹកថ្ងៃទី៤ ខែតុលា នេះ ឲ្យដឹងថាលោក ឈាង វុន គួរបង្ហាញឯកសារផ្កូវការ ដែលចោទថា កម្មករបានក្លែងធ្វើពុតជាឈឺ ក្នុងគោលបំណងកេងកឹបថវិកា ប.ស.ស ដើម្បីយើងពិនិត្យមើល យើងអត់ជឿងទេការលើកឡើងរបស់លោកធ្វើអោយបះពាល់អារម្មណ៍របស់កម្មករច្រើនណាស់។
ក្នុងនាមខ្លួនគាត់ជាតំណាងរាស្ត្រ និយាយចឹងអត់សមរម្យ ព្រោះគាត់ជាតំណាងរាស្ត្របោះឆ្នោតដោយរាស្ត្រ ចឹងបញ្ហាសង្គមជាច្រើនគាត់មិនលើកឡើង គាត់មិនគួរលើកឡើងពីបញ្ហាកម្មករនោះទេ។ កន្លងមកកម្មករគឺជាអ្នកដែរប្រឹងធ្វើការដើម្បីជួយដល់សេដ្ឋកិច្ចជាតិ បង់ពន្ធជូនរដ្ឋ នឹងធ្វើអោយកំនើនមានការងារធ្វើគឺកម្មករហ្នឹងឯង។ នេះជាការលើកឡើងរបស់លោកអាត់ ធន់ ។
លោកបន្ថែមថា កម្មករពួកគាត់បង់ពន្ធជូនរដ្ឋប្រចាំខែ បើកលុយអោយពួកគាត់ផង ហើយរឿងការឃុបឃឹតគ្នា យើងមិនមានព័ត៌មានហ្នឹងទេ យើងមានតែព័ត៌មានពេលកម្មករឈឺហើយឈប់មិនបាន ដែលឥឡូវកំពុងមានបណ្តឹងជាច្រើនពេលដែលកម្មករឈឺអត់អាចឈប់បាន ដោយសារតែពេទ្យហ្នឹងអត់ចេញថ្ងៃឈប់សម្រាក់អោយ កម្មករឈឺហើយពិបាក់ឈប់ទៀតរាល់ថ្ងៃ។
គួរជម្រាបថា លោក ឈាង វុន កាលពីថ្មីៗលោកបានលើកឡើងថា ប្រាក់ចំណូលរដ្ឋត្រូវបានបាត់បង់តាមរយៈការឃុបឃិតក្លែងបន្លំ ពាក់ព័ន្ធនឹងអ្នកដែលធ្វើពុតជាឈឺ ដើម្បីទទួលបានការឈប់សម្រាកពីការងារ។ លោកថា គ្រូពេទ្យ និងអ្នកជំងឺឃុបឃិតគ្នាដោយការចែកលុយ ដែលបានពីបេឡាជាតិរបបសន្តិសុខសង្គម (ប.ស.ស) ដោយគ្រូពេទ្យចេញវិក្កយបត្រសម្រាប់ការព្យាបាល៕
អត្ថបទ៖ សុខ លាភ
