ជនជាតិចិន២ក្រុម បង្កទំនាស់ ផ្ទុះអាវុធចំនួន៣គ្រាប់ ក្នុងហាងហ្គ្រីនកាហ្វេ
ភ្នំពេញ៖ សមត្ថកិច្ចនគរបាលខណ្ឌទួលគោក បានឲ្យដឹងថាជនជាតិចិននិងជនជាតិចិនបង្កទំនាស់គ្នាបណ្តាលឲ្យផ្ទុះអាវុធខុសច្បាប់ចំនួន០៣គ្រាប់ ធ្វើឲ្យខូចខាតទ្រព្យសម្បត្តិក្នុងហាងមួយចំនួន (បែកកញ្ចក់ទ្វារចូលខាងមុខ និងកញ្ចក់បន្ទប់) នៅថ្ងៃទី២៧ ខែកញ្ញា ឆ្នាំ២០១៩ វេលាម៉ោងប្រហែល១៩នឹង៥០នាទី ស្ថិតនៅចំណុចក្នុងភោជណីយ៍ដ្ឋាន និងកាហ្វេ យីហោ «ហ្គ្រីនកាហ្វេ» នៅផ្ទះលេខ១៦៦ ផ្លូវលេខ១៥០ ក្រុមទី៨ ភូមិ៣ សង្កាត់ទឹកល្អក់ទី២ខណ្ឌទួលគោក។
សមត្ថកិច្ចបន្តថាមុនពេលកើតហេតុមានជនជាតិចិន២ក្រុម ប្រើប្រាស់អាវុធខ្លីចំនួន០១ដើម មិនស្គាល់ម៉ាក ជិះរថយន្តចំនួន០១គ្រឿង ម៉ាកHilanderពណ៌ទឹកប្រាក់ មានស្លាកលេខតែមើលមិនច្បាស់ដល់ (រូបភាព និងសកម្មភាពចាប់យកពីកាមេរ៉ាសុវត្ថិភាពនៅកន្លែងកើតហេតុ)។
វត្ថុតាងចាប់យករួមមានៈ សំបកគ្រាប់កាំភ្លើងខ្លីបាញ់រួចចំនួន០៣គ្រាប់មិនស្គាល់ម៉ាក, ជនរងគ្រោះមិនស្គាល់អត្តសញ្ញាណ មានបក្ខពួកចំនួន០២នាក់ ភេទប្រុស ជនជាតិចិន (ក្រោយពេលកើតហេតុ មិនដាក់ពាក្យប្តឹងគេចខ្លួនបាត់)។
បច្ចុប្បន្នក្រោយពេលកើតហេតុកម្លាំងផ្នែកព្រហ្មទណ្ឌ និងកម្លាំងនគរបាលប៉ុស្តិ៍ទឹកល្អក់ទី២ នៃអធិការដ្ឋាននគរបាលខណ្ឌទួលគោក បានចុះពិនិត្យដល់កន្លែងកើតហេតុ បំភ្លឺសាក្សីដឹងរឿងហេតុបានចំនួន០២នាក់ និងឆែកកាមេរ៉ាសុវត្តិភាពនៅកន្លែងកើតហេតុដើម្បីកំណត់មុខសញ្ញាធ្វើសកម្មភាព ឈានដល់ការឃាត់ខ្លួនជនអ្នកបង្កចាត់ការតាមផ្លូវច្បាប់ ៕
