លោក ពេជ្រ ស្រស់ ៖ ច្បាប់ចរាចរណ៍ មិនត្រូវបែងចែកអ្នកតូច អ្នកធំ អ្នកមាននិងអ្នកក្រនោះឡើយ
(ភ្នំពេញ)៖ ប្រធានគណបក្សយុវជនកម្ពុជា បានសម្តែងភាពសោកស្តាយដែលខ្លួនមិនគោរពច្បាប់ចរាចរណ៍ផ្លូវគោក នៅដើមសប្តាហ៍នេះ បន្ទាប់ពីរងចូលបង់ថ្លៃផាកពិន័យចំពោះការជិះរថយន្តមិនពាកខ្សែក្រវ៉ាត់ នៅព្រឹកថ្ងៃទី១៦ ខែកញ្ញានេះ។
នៅលើបណ្តាញសង្គម Facebook នៅព្រឹកថ្ងៃចន្ទ័ នេះ ប្រធានគណបក្សយុវជនកម្ពុជា លោកពេជ្រ ស្រស់ បានអោយដឹងថា មួយ 0 ស្មើ ២៥ ០០០ រៀល កាត់ព្រឹក ដោយសារមិនពាក់ខ្សែក្រវ៉ាត់។
លោកបន្ថែមថា សូមចូលរួមគោរពនូវច្បាប់ចរាចរណ៍ទាំងអស់គ្នាដើម្បីការពារជីវិតខ្លួនឯងនិងអ្នកដទៃការគោរពច្បាប់ គឺ ត្រូវស្មើភាពគ្នាមិនត្រូវបែងចែកអ្នកតូច អ្នកធំ អ្នកមាននិងអ្នកក្រនោះឡើយ។
សូមជំរាបថា កាលពីប៉ុន្មានឆ្នាំមុន ខណៈដែលទៅចូលរួមគោរពវិញ្ញាណក្ខន្ធ លោកតា សាយ ភូថង, សម្តេចតេជោ ហ៊ុន សែន បានជួបសំណេះសំណាលជាមួយប្រជាពលរដ្ឋ និងបានជិះម៉ូតូឌុប នៅលើស្ពានកោះកុង ដោយពុំបានត្រៀមខ្លួនជាមុន។ ពេលនោះ មានក្រុមប្រជាពលរដ្ឋលើកឡើងថា សម្តេចភ្លេចពាក់មួកសុវត្ថិភាព។ ប៉ុន្តែទោះជាយ៉ាងណា សម្តេចតេជោ ហ៊ុន សែន បានចូលទៅបង់ការផាកពិន័យជូននគរបាលផងដែរ ដើម្បីធ្វើជាគំរូដល់ជនដទៃទៀត ឱ្យមានការគោរពច្បាប់៕
អត្ថបទ៖ សុខ លាភ
