និទ្ទេស A បាក់ឌុប២០១៩ នៅភ្នំពេញច្រើនជាងគេ តាមពីក្រោយសៀមរាប បាត់ដំបង តាកែវ
ភ្នំពេញ៖ ខណៈដែលលទ្ធផលប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម័យប្រឡងថ្ងៃទី១៩ សីហា ២០១៩ សម្រាប់មណ្ឌលរាជធានីភ្នំពេញ និងមណ្ឌលខេត្តកណ្ដាល នឹងប្រកាសនៅរសៀលថ្ងៃទី០៩ ខែកញ្ញា ឆ្នាំ២០១៩ ក្នុងនោះបេក្ខជនចំនួន៧៩ ០៥២នាក់បានជាប់ ស្មើ៦៨.៦២% ក្នុងនោះមានបេក្ខេជនជាប់និទ្ទេស A មាន៤៤៣នាក់។ នេះបើយោងតាមសេចក្តីប្រកាសព័ត៌មានរបស់ក្រសួងអប់រំយុវជន នឹងកីឡា។
ក្នុងចំណោមបេក្ខជនប្រឡងជាប់និទ្ទេស A មានចំនួន ៤៤៣នាក់ ពីសម័យប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩ បេក្ខជននៅរាជធានីភ្នំពេញ បន្តនាំមុខគេលើចំនួនសរុប បន្ទាប់មក សៀមរាប បាត់ដំបង តាកែវ និងបណ្តាខេត្តផ្សេងទៀត។
រាជធានី-ខេត្ត សរុប២១ មានសិស្សដែលប្រឡងជាប់និទ្ទេស A។ ក្នុងចំណោមនិទ្ទេស A ៤៤៣នាក់ រាជធានីភ្នំពេញ មាន១៤១នាក់ សៀមរាប ៣៨នាក់ បាត់ដំបង៣២នាក់ តាកែវ២៩នាក់ កំពង់ចាម២៧នាក់ ព្រៃវែង២៧នាក់ បន្ទាយមានជ័យ២៥នាក់ កណ្តាល២៣នាក់ កំពត២៣នាក់ ត្បូងឃ្មុំ១៥នាក់ កំពង់ធំ១៤នាក់ ព្រះសីហនុ១៣នាក់ ស្វាយរៀង៨នាក់ ពោធិ៍សាត់៧នាក់ កំពង់ឆ្នាំង៦នាក់ កំពង់ស្ពឺ៦នាក់ ក្រចេះ៤នាក់ រតនគិរី២នាក់ កោះកុង១នាក់ មណ្ឌលគិរី១នាក់ និងឧត្តរមានជ័យ១នាក់។
គួរបញ្ជាក់ផងដែរថា បេក្ខជនប្រឡងឆ្នាំ២០១៩មានចំនួន ១១៧ ០៤៣ នាក់ ស្រី ៦០៤២៧ នាក់ មាន ២០២ មណ្ឌល ចែកជាថ្នាក់វិទ្យាសាស្ត្រមានបេក្ខជនចំនួន៤៤៦៩០នាក់ មាន ៧៥ មណ្ឌល និងថ្នាក់វិទ្យាសាស្ត្រសង្គមមានបេក្ខជនចំនួន ៧២៣៥៣នាក់ មាន ១២៧ មណ្ឌល។បេក្ខជនអវត្តមាន ពេលប្រឡងមាន១៨១៨ នាក់ ស្រី ៦៩៦នាក់ ជាភាគរយ ១.៥៥%។
គួរឮកថាឆ្នាំ២០១៨៖ បេក្ខជនប្រឡងជាប់បាក់ឌុបមានចំនួន ៧៦,០៣៤នាក់ ត្រូវជា ៦៧.០៧ភាគរយ នៃបេក្ខជនចូលរួមប្រឡងសរុប ១១៧,០៦១នាក់។ បេក្ខជនជាប់និទ្ទេស Aមានចំនួន ៤០៨នាក់។ និទ្ទេស Bចំនួន ២,២២២នាក់ និទ្ទេស C ចំនួន ៦,០៤១នាក់ និទ្ទេស D ចំនួន ១៥,១៨០នាក់ និងនិទ្ទេស Cចំនួន ៥,២១៨៣នាក់៕
អត្ថបទ៖ សុខ លាភ
