បុរសម្នាក់ស្រវឹងស្រាជោគជាំ ជិះម៉ូតូជ្រុលទៅបុកខឿនរូបសំណាក់ បណ្ដាលឲ្យស្លាប់មួយរំពេច !!

(កណ្តាល)៖ បុរសម្នាក់ជិះម៉ូតូក្នុងស្ថានភាពស្រវឹងចេញពីផ្ទះប្អូនក្នុងគោលបំណងត្រឡប់ទៅផ្ទះរបស់ខ្លួនវិញ ខណៈកំពុងជិះបាត់បង់ម្ចាស់ការបណ្តាលឲ្យជ្រុលទៅបុកខឿនរូបសំណាក់ បោកខ្លួនស្លាប់ភ្លាមៗមួយរំពេច បង្កឲ្យមានការភ្ញាក់ផ្អើលកាលពីវេលម៉ោង ១២និង១៥នាទីរំលងអធ្រាត ឈានចូលថ្ងៃទី០៧ ខែកញ្ញា ឆ្នាំ២០១៩ តាមបណ្តោយផ្លូវលំចូលវត្តខ្សុំ ស្ថិតនៅក្នុង ភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល ។

មន្ត្រីនគរបាលចរាចរណ៍ស្រុកកៀនស្វាយបានឲ្យដឹងថា៖ ជនរងគ្រោះឈ្មោះ ជួង សុភា ភេទប្រុស អាយុ ៣៣ឆ្នាំ មានទីលំនៅក្នុង ភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល ជិះម៉ូតូម៉ាកស៊ុហ្ស៊ូគី ស្មាស់ ពណ៌ខ្មៅ ពាក់ស្លាកលេខ ភ្នំពេញ 1BL-34 93 ។

ប្រភពដដែលបានបន្តថា៖ នៅមុនពេលកើតហេតុជនរងគ្រោះបាននៅអង្គុយផឹកស្រានៅផ្ទះប្អូនដែលស្ថិតនៅខាងវត្តខ្សុំ  បន្ទាប់ពីផឹកអស់រយៈពេលជាច្រើនម៉ោងមានសភាពស្រវឹងជោកជាំជនរងគ្រោះក៏បានទាញម៉ូតូជិះចេញពីកន្លែងផឹកក្នុងគោលបំណងត្រឡប់ទៅផ្ទះវិញ ខណៈជិះដល់ចំណុចកែងផ្លូវចូលវត្តក៏ជ្រុលទៅបុកខឿនផ្លូវ បណ្តាលឲ្យបោកខ្លួនស្លាប់ភ្លាមៗមួយរំពេចតែម្តង ។

បច្ចុប្បន្នម៉ូតូ និងសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី ៕

ប្រភព៖ អគ្គស្នងការដ្ឋាននគរបាលជាតិ