លោក កែវ រ៉េមី ៖ អ្វីដែលខ្ញុំស្រមៃគឺបានសម្រេចហើយ ទាំងទង់ជាតិ និង ភ្លេងជាតិត្រូវបានបន្លឺឡើងក្នុងកម្រិតពិភពលោក
ការលើកឡើងបែបនេះ បន្ទាប់ពីកីឡាករ តេក្វាន់-ដូ ITF របស់កម្ពុជាគឺកីឡាករ ប៉ាល់ ជីវ័ន ទទួលបានជ័យជំនះត្រលប់មកប្រទេសកម្ពុជាវិញបន្ទាប់ពីដណ្តើមបានមេដាយមាស ១គ្រឿងបន្ទាប់ពីយកឈ្នះកីឡាករអាហ្សង់ទីន Dorado Gabriel ហើយបន្តផ្តួលកីឡាករជម្រើសជាតិបារាំងដើមកំណើតវៀតណាម Nguyen Truc នៅវគ្គពាក់កណ្តាលផ្តាច់ព្រ័ត្រ មុននឹងក្លាយជាម្ចាស់មេដាយមាស ក្រោយទទួលជ័យជម្នះលើកីឡាករឆ្នើមព័រតូរីកូ Datiz Luis រួចមក។ នៅក្នុងព្រឹត្តិការណ៍ប្រកួតកីឡាតេក្វាន់-ដូ ITF ជ្រើសរើសជើងឯកកម្រិតពិភពលោក ធ្វេីនៅទីក្រុង Plovdiv ប្រទេសប៊ុលហ្គារី។
នេះបើយោងតាមការឲ្យពីក្រសួងបានអោយដឹងថា បេីគិតមកទល់ពេលនេះ រូបគេគឺជាកីឡាករដំបូងបំផុតក្នុងប្រវត្តិសាស្ត្រ ២៥ឆ្នាំនៃតេក្វាន់ដូ ITF កម្ពុជា (គិតចាប់តាំងពីបង្កើតមក) ដែលបានយកឈ្នះមេដាយមាសលើវិញ្ញាសាសម្តែងមេគុនខ្សែក្រវាត់ខ្មៅ៥ដាន់ (Adult Male V Degree) ពីព្រឹត្តិការណ៍ ITF Taekwondo World Championship នោះ។ចំពោះព្រឹត្តិការណ៍ ITF Taekwondo World Championships លើកទី២១ នេះមានការចូលរួមពីបណ្ដាប្រទេស៨៤ផ្សេងៗគ្នា មានប្រមាណ ១៥០០នាក់៕
អត្ថបទ៖ សុខ លាភ
