គ្រូបង្វឹកក្លឹបក្រសួងការពារជាតិច្នៃក្បួនការពាររបស់អាស៊ីអឺរ៉ុបទទួលណាហ្គាល្ងាចនេះ
ថ្ងៃទី 30ខែមីនា ឆ្នាំ ២០១៩ ម៉ោង 02 :29pm
ភ្នំពេញ៖ លោក ភា សុភក្ត្រា នឹងយកក្បាច់ការពារជោគជ័យរបស់ក្លឹបអាស៊ីអឺរ៉ុបមកប្រើក្នុងការប្រកួតសប្តាហ៍ទី២នៃលីគកម្ពុជាដែលក្រសួងការពារជាតិត្រូវប្រកួតជាមួយក្រុមការពារតំណែងជើងឯកណាហ្គាវើលនៅស្តាតចាស់។
សប្តាហ៍បើកឆាកលីគកំពូលកម្ពុជារដូវកាល២០១៩កន្លងទៅ អាស៊ីអឺរ៉ុបទទួលបាន១ពិន្ទុពីការប្រកួតជាមួយក្រុមខ្លាំងណាហ្គាវើល បន្ទាប់ពីលទ្ធផលស្មើគ្នា ១-១។ ការប្រកួតនោះមើលឃើញថា ម្ចាស់ផ្ទះអាស៊ីអឺរ៉ុបបានប្រើយុទ្ធសាស្ត្រការពារបានល្អដែលមិនអាចធ្វើឲ្យណាហ្គាវើលទម្លាយសំណាញ់ទីបានស្រួលឡើយ។
ផ្អែកតាមលទ្ធផលខាងលើនេះ លោក ភា សុភត្ត្រា គិតថា អាស៊ីអឺរ៉ុបការពារបានល្អ ហើយលោកអាចយកគំរូតាម។ លោកបានប្រាប់ Sabay ថា ណាហ្គាវើលរដូវកាលនេះមមាញឹកខ្លាំង ប៉ុន្តែការងាររវល់គឺការប្រកួតអន្តរជាតិ ដូច្នេះកម្រិតរបស់ក្រុមណាហ្គាវើលកាន់តែខ្លាំងជាងឆ្នាំមុន ប៉ុន្តែលោកបានដឹងពីកម្រិតនៃការប្រយុទ្ធ និងការពាររបស់ណាហ្គាវើល។
លោកបន្តថា ៖«ខ្ញុំបានតាមដានការប្រកួតកាលជាមួយអាស៊ីអឺរ៉ុបដែរគឺ អាស៊ីអឺរ៉ុបការពារបានល្អជាមួយណាហ្គា។ ១គ្រាប់ណាហ្គាគឺជាគ្រាប់បាល់រៀបចំ អីចឹងខ្ញុំផ្តោតទៅលើរបៀបនៃការការពាររបស់អាស៊ីអឺរ៉ុប យកមកច្នៃប្រឌិតបន្ថែមបូកនឹងរបៀបការពារដែលទ័ពមាន»។
ជុំវិញក្រុមរបស់ខ្លួន គ្រូបង្វឹកវ័យក្មេងរូបនេះបានឲ្យដឹងថា ក្រសួងការពារជាតិនឹងមិនមានការផ្លាស់ប្តួររបៀបលេងច្រើនទេ ពីព្រោះក្រុមបានត្រៀមរួចហើយ គ្រាន់តែថា ត្រូវប្រឹងបន្ថែមទៀតនៅតំបន់ប្រយុទ្ធ។ យ៉ាងណា ក្រុមរបស់លោកមានកីឡាករ៣នាក់របួស ដូច្នេះជាបញ្ហាលំបាកសម្រាប់លោកដែរ។
លោក ភា សុភក្ត្រា បានលើកឡើងពីចំណុចខ្លាំងរបស់ណាហ្គាវើលដែលក្រុមរបស់លោកត្រូវប្រុងប្រយ័ត្នគឺលោក មាស ចាន់ណា គ្រូណាហ្គាពូកែរៀបចំលេងបាល់លើកចេញពីជ្រុង និងហ្វ្រីឃីកលើកពីចម្ងាយ។ ចំពោះការប្រយុទ្ធបែបវាយបកគឺមិនសូវលឿនទេ បើប្រៀបធៀបនឹងរដូវកាលមុន។
កាលពីសប្តាហ៍ទី១កន្លងទៅ ក្រសួងការពារជាតិរកបាន១ពិន្ទុ តាមរយៈស្មើសូលទីលូអង្គរ ១-១ ខណៈណាហ្គាវើលក៏បាន១ពិន្ទុ បន្ទាប់ពីស្មើអាស៊ីអឺរ៉ុបដោយលទ្ធផល ១-១។
ការប្រកួតរវាងក្រុមខ្លាំងម្ចាស់ផ្ទះក្រសួងការពារជាតិ និងណាហ្គាវើល វេលាម៉ោង៦ល្ងាច ថ្ងៃសៅរ៍ ទី៣០ ខែមីនា ចុងសប្តាហ៍នេះនៅស្តាតចាស់។ សូមបងប្អូនចូលរួមគាំទ្រអោយច្រើនកុះករ៕
កាលវិភាគសម្រាប់ការប្រកួតក្នុងខែមីនានេះ
កម្មវិធីប្រកួតសប្តាហ៍ទី១ ថ្ងៃសៅរ៍ ទី៣០ មីនា
- ប៉ូលិស vs អាស៊ីអឺរ៉ុប ម៉ោង៣:៣០នាទីរសៀល នៅទីលានអគ្គិសនីកម្ពុជា
- វិសាខា vs គីរីវង់សុខសែនជ័យ ម៉ោង៣:៣០នាទីរសៀល នៅទីលានវិសាខា
- ណាហ្គាវើល vs ក្រសួងការពារជាតិ ម៉ោង៦ល្ងាច នៅស្តាតចាស់
កម្មវិធីប្រកួតសប្តាហ៍ទី១ ថ្ងៃអាទិត្យ ទី៣១ មីនា
- សូលទីលូអង្គរ vs ព្រះខ័នរាជស្វាយរៀង ម៉ោង ៣:៣០នាទីរសៀល នៅទីលានខេត្តសៀមរាប
- យុវជន U18 បាទី vs ភ្នំពេញក្រោន ម៉ោង៣:៣០នាទីរសៀល នៅទីលានបាទី
- កំពង់ចាម vs អង្គរថាយហ្គឺរ ម៉ោង៣:៣០នាទីរសៀល នៅទីលានវិទ្យាល័យម៉េមត់
អគ្គិសនីកម្ពុជា vs បឹងកេត ម៉ោង៣:៣០នាទីរសៀល នៅទីលានអគ្គិសនីកម្ពុជា។
អត្ថបទ ៖ ពេជ្រ គឹមស្រ៊ិន
