សត្វខ្លាឈ្មោះ «ម៉ាប់» នៅភ្នំតាម៉ៅ ជាប្រភេទខ្លាឥណ្ឌូចិន សល់តែមួយគត់ក្នុងព្រៃកម្ពុជា បានស្លាប់ហើយ!

(តាកែវ)៖ យោងតាមការបង្ហោះរបស់អង្គការសម្ព័ន្ធភាពសត្វព្រៃ នៅរសៀលថ្ងៃទី២១ ខែសីហា ឆ្នាំ២០១៩ បានបង្ហោះអំពីការស្លាប់ របស់សត្វខ្លាមួយក្បាល ដែលជាប្រភេទសត្វខ្លាឥណ្ឌូចិននៅឯភ្នំតាម៉ៅ ខេត្តតាកែវ ដោយបានបង្ហោះទាំងស្រុងថា «សោកស្តាយចំពោះការបាត់បង់ ម៉ាប់/ចាស្ប៉ា (១៩៩៨-២០១៩) វាពិតជាគួរឱ្យក្តុកក្តួល និងសោកសៅ ចំពោះដំណឹងនៃការស្លាប់របស់ចាស្ប៉ា ដែលមានឈ្មោះគួរឱ្យស្រឡាញ់មួយទៀតគឺ ម៉ាប់ នៅឯភ្នំតាម៉ៅ។ ម៉ាប់ ត្រូវបានគេជួយសង្គ្រោះពីក្រុមអ្នកបរបាញ់សត្វនៅ ឆ្នាំ១៩៩៨ តាំងពីគេនៅជាកូនខ្លាតូចម្ល៉េះ។ ហើយវាត្រូវបានជឿថា ជាប្រភេទខ្លាឥណ្ឌូចិន ដែលនៅសេសសល់ចុងក្រោយតែមួយគត់ក្នុងព្រៃកម្ពុជា។ គាត់ទទួលបានជម្រកថ្មី ក្នុងទ្រុងដ៏ធំមួយហ៊ុមព័ទ្ធទៅដោយព្រៃឈើ និងមានការថែទាំជាពិសេសដោយអង្គការ Born Free Foundation នៅភ្នំតាម៉ៅផ្ទាល់ ហើយជារឿយៗ អាចបានឃើញ និងឮសម្លេងដើរល្បាតរបស់គាត់នៅពេលរសៀល។ គាត់នឹងទទួលបាននូវការនឹករឮកយ៉ាងក្រៀមក្រំ និងមិនអាចបំភ្លេចបាន! សូមឱ្យគាត់ទៅកាន់ទីស្ងប់សុខ!»៕