ពលករ១១នាក់បានស្លាប់ នឹង៤នាក់ទៀតរងរបួស ដោយសារគ្រោះថ្នាក់ចរាចរណ៍ នៅស្រះកែវ
ថៃ ៖ យ៉ាងហោចណាស់ពលករចំណាកស្រុកចំនួន ១១នាក់បានស្លាប់ភ្លាមៗនៅកន្លែងកើតហេតុ នឹង៤នាក់ទៀតរងរបួសយ៉ាងធ្ងន់ធ្ងរ ខណៈដែលពួកគេកំពុងជិះលើរថយន្តឈ្នួលទៅវ៉ៃត្រាបន្តច្បាប់នៅខ្សែបន្ទាត់ព្រំដែន ក៏ត្រូវប៉ះទង្គិចជាមួយនឹងរថយន្តសណ្តោង ។
ហេតុការណ៍ដ៏រន្ធត់មួយនៃករណីគ្រោះថ្នាក់ចរាចរណ៍បានកើតឡើងនៅថ្ងៃទី១៨ ខែសីហា ឆ្នាំ២០១៩ តាមបណ្តោយផ្លូវពីស្រះកែវ ទៅច័ន្ទបុរី ក្បែរផ្លូវចូលទៅសាលាស្រុកវុំាងសុំប៊ូនខេត្តស្រះកែវ ប្រទេសថៃ ។
នៅក្នុងហេតុការណ៍នោះដែរ សមត្ថកិច្ចថៃ បានបញ្ជាក់ថា ជនរងគ្រោះទាំងអស់មានចំនួន ១៥នាក់ដែលបានធ្វើដំណើរទៅកាន់ព្រំដែនត្រង់ចំណុចច្រកអន្តរជាតិបានឡែម (ច្រកអន្តរជាតិដូងជាប់នឹងស្រុកកំរៀង) ដើម្បីវ៉ៃត្រាបំពេញឯកសារក្នុងការរស់នៅបន្តក្នុងប្រទេសថៃ ។
ក្រោយពីមានការជួយសង្គ្រោះរួចមក គឺមានពលករស្លាប់ចំនួន ១១ នាក់ (ប្រុស៥នាក់ និង ស្រី ៦នាក់) ក្នុងនោះមានអ្នកបើកបររថយន្តផងដែរ និង៤នាក់ទៀត រងរបួសធ្ងន់ដែលត្រូវបានបញ្ជូនទៅសង្គ្រោះនៅមន្ទីរពទ្យ វុំាងសុំប៊ូន ។ ប៉ូលិសបានសន្និដ្ឋានបឋមថា បញ្ហានេះគឺបណ្តាលមកពីអ្នកបើកបររយន្តតួរីសដេកលក់ ទើបរេចង្កូតបែបនេះ ៕
អត្ថបទ៖ សុខ លាភ
