Mint ចេញមុខមកទទួលស្គាល់ថាប្អូនខ្លួន ពិតជាសមាជិកម្នាក់ក្នុងក្រុម ដែលធ្វើបាបមនុស្សស្រី ក្នុងក្លឹបមែន

ថៃ៖ នាពេលថ្មីៗនេះកំពុងតែមានព័ត៌មានដ៏ក្តៅគគុក ដោយមានការលេចចេញនូវChatរបស់នារីម្នាក់បាននិយាយថា ត្រូវបានប្អូនប្រុសរបស់តួឯកស្រីល្បីម្នាក់ និងក្រុមអ្នកសម្តែងSeries ធ្វើបាបរាងកាយនៅក្នុងក្លឹបកម្សាន្តមួយកន្លែង។

ក្រោយពីមានព័ត៌មាននេះលេចឡើង អ្នកគាំទ្រមានការសង្ស័យថា តើអ្នកប្រុសរូបនោះជាលោកMond Tanutchai ប្អូនប្រុសតារាស្រីMint Chalidaឬក៏យ៉ាងណា?

ជាក់ស្តែងMintបានផ្តល់បទសម្ភាសន៍ពីរឿងនេះយ៉ាងដូច្នោះថា៖

« Mondគេបាននិយាយប្រាប់ខ្ញុំថា គេបានទៅកន្លែងកម្សាន្តមួយ ហើយបាននៅក្នុងហេតុការណ៍នោះពិតមែន ប៉ុន្តែរឿងបែបនេះខ្ញុំមិនអាចស្តាប់តែម្ខាងបានទេ ត្រូវស្តាប់ទាំងសងខាង ហើយម្យ៉ាងវិញទៀតខ្ញុំក៏មិនជឿ១០០ភាគរយដែរ ព្រោះពេលដែលមានគ្រឿងស្រវឹងចូលខ្លួន រឿងពិតយ៉ាងណាក៏យើងមិនដឹងច្បាស់ដែរ។ និយាយនេះមិនបានន័យថាខ្ញុំកាន់ជើងប្អូនទេ តែទុកឲ្យមានការដោះស្រាយពីភាគីទាំងសងខាងវិញល្អជាង។តាមពិតទៅ ខ្ញុំតែងតែដាស់តឿនប្អូនជានិច្ច ឲ្យប្រយ័ត្នព្រោះយើងជាមនុស្សរបស់មហាជន តែចុងក្រោយនៅតែមានរឿងបែបនេះកើតឡើង»។

ទោះបីជាMintបានចេញមករៀបរាប់ពីរឿងនេះក៏ពិតមែន តែអ្នកគាំទ្រនៅតែរង់ចាំការបកស្រាយការពិតពីលោកMond ដែលជាអ្នកដែលនៅក្នុងហេតុការណ៍នោះផ្ទាល់៕