លោក អ៊ូ ចាន់រ័ត្ន អហោសិកម្មអោយលោក នួន ជា ទោះបីមានសាច់ញាតិ ស្លាប់ក្នុងរបបដឹកនាំរបស់លោក

ភ្នំពេញ៖ ឪពុកខ្ញុំ ឪពុកធំនិងឪពុកមា បង្កើតរបស់ខ្ញុំ សុទ្ធតែត្រូវបាន យកទៅសម្លាប់ ក្នុងចំណោមអ្នក ដែលត្រូវសម្លាប់មុនគេ រួមទាំងជីតាបង្កើតនិងញាតិសន្តាន ដែលត្រូវបានរងគ្រោះដោយរបបនេះ។ នេះជាការលើកឡើងរបស់លោក អ៊ូ ចាន់រ័ត្ន អតីតមន្ត្រីជាន់ខ្ពស់ គណបក្សសង្គ្រោះជាតិ។

ទោះបី ជាមានសាច់ញ្ញាតិ ត្រូវស្លាប់នៅក្នុសម័យខ្មែរក្រហមយ៉ាងណាក្តី លោក អ៊ូ ចាន់រ័ត្ន អតីតមន្ត្រីជាន់ខ្ពស់ គណបក្សសង្គ្រោះជាតិ បានអហោសិកម្ម ដល់វិញ្ញាណក្ខន្ធលោក នួន ជា បងធំទី២ ក្នុងរបបកម្ពុជាប្រជាធិបតេយ្យ ឬខ្មែរក្រហម ។

សរសេរលើបណ្តាញ សង្គមហ្វេសប៊ុក នៅថ្ងៃទី៦ ខែសីហា ឆ្នាំ២០១៩ លោក អ៊ូ ចាន់រ័ត្ន បានចូលរួមរំលែកទុក្ខ ដ៏ក្រៀមក្រំបំផុត ជាមួយក្រុមគ្រួសារលោកតា នួន ជា ជាអតីតមេដឹកនាំ ខ្មែរក្រហម ដែលបានទទួល អនិច្ចកម្ម។

ជាមួយគ្នានេះដែរ អតីតមន្រ្តីបក្សប្រឆាំង បង្ហាញការសោកស្តាយ ដែលលោក នួន ជា មិនបានលាតត្រដាង ការពិតពីរបបដឹកនាំ របស់លោក ទៅតាមសេចក្តីប្រាថ្នា របស់លោក ដែលអាចជាប្រយោជន៍ ប្រវត្តិសាស្ត្រ និងយុត្តិធម៌ ដល់ជនរងគ្រោះដែលមានមនុស្ស រាប់លាននាក់ បាត់បង់ជីវិត ក្រោមការដឹក នាំរបស់ក្រុមលោក។

លោកថា ឪពុកខ្ញុំ ឪពុកធំនិងឪពុកមា បង្កើតរបស់ខ្ញុំ សុទ្ធតែត្រូវបាន យកទៅសម្លាប់ ក្នុងចំណោមអ្នក ដែលត្រូវសម្លាប់មុនគេ រួមទាំងជីតាបង្កើតនិងញាតិសន្តាន ដែលត្រូវបានរងគ្រោះដោយរបបនេះ។ ទោះជាយ៉ាងណា ខ្ញុំសូមអហោសិកម្មជូនលោក និងសូមវិញ្ញាណក្ខន្ធ របស់លោកបានដល់ សុគតិភពកុំបីខាន”។ វាជាមេរៀនប្រវត្តិសាស្ត្រ ដ៏មហាសោកនាដកម្ម សំរាប់អ្នកដឹកនាំនយោបាយ និងប្រជារាស្ត្រខ្មែរ ដែលមិនអាចបំភ្លេចបាន៕

អត្ថបទ៖ សុខ លាភ