លោក ជិន ម៉ាលីន៖ ការសុំទម្លាក់ចោលការចោទប្រកាន់ទៅលើ លោក កឹម សុខា គឺមិនអាចទៅរួចនោះឡើយ

ភ្នំពេញ៖ ថ្លែងនៅក្នុងសន្និសីទព័ត៌មានស្តីពីអំពី «សមិទ្ធផល១ឆ្នាំ ក្រោយការបោះឆ្នោត» ដែលធ្វើឡើង​នៅសាលប្រជុំនៃទីស្តីការគណៈរដ្ឋមន្រ្តី នាព្រឹកថ្ងៃទី១ ខែសីហា ឆ្នាំ២០១៩ មន្រ្តីជាន់ខ្ពស់ក្រសួងយុត្តិធម៌ បានថ្លែងថា សំណើសុំការទម្លាក់ចោលការចោទប្រកាន់ទៅលើ លោក កឹម សុខា អតីតប្រធានគណបក្ស​សង្គ្រោះជាតិ គឺមិនអាចទៅរួចនោះឡើយ ហើយក៏មិនអាចមកបញ្ជាមកមកលើរាជរដ្ឋាភិបាល ក្នុងនាមជារដ្ឋអធិបតេយ្យមួយនោះបានទេ។

លោក ជិន ម៉ាលីន អ្នកនាំពាក្យក្រសួងយុត្តិធម៌ បានលើកឡើងថា រាជរដ្ឋាភិបាលមិនមានសិទ្ធិអ្វី​ដើម្បី​អន្តរាគមន៍ទៅស្ថាប័នតុលាការ ដែលជាស្ថាប័នឯករាជ្យ ហើយក៏មិនមែនជាប្រទេស​កាន់លទ្ធិប្រ​ជាធិប​តេយ្យ និងមាននីតិរដ្ឋផងដែរ។

ការថ្លែងបែបនេះ បន្ទាប់ពីស្ថានទូតអាមេរិកប្រចាំនៅកម្ពុជា បានប្រកាសតាមបណ្តាញសង្គម Facebook ដោយលើកឡើងអំពីអតីតគណបក្សប្រឆាំង ដែលត្រូវរំលាយចោលដោយតុលាការ ពាក់ព័ន្ធនឹងករណីក្បត់ជាតិ ហើយជំរុញឱ្យរដ្ឋាភិបាលកម្ពុជា ស្តារលទ្ធិប្រជាធិបតេយ្យ រួមទាំងធ្វើការទម្លាក់បទចោទប្រកាន់ទាំងឡាយប្រឆាំងលោក កឹម សុខា។

ឆ្លើយតបសំណើទូតអាមេរិកទម្លាក់បទចោទលើលោក កឹម សុខា, លោក ជិន ម៉ាលីន ថា «រដ្ឋអធិបតេយ្យ គ្មាននរណាអាចមកបង្គាប់បញ្ជាបានឡើយ ហើយគ្មានឥទ្ធិពលអ្វីមកលើកម្ពុជា»៕

អត្ថបទ៖ សុខ លាភ