ឥណ្ឌាហាក់ស្រពេចស្រពិលក្នុងការទិញដ្រូនពីអាមេរិក ក្រោយត្រូវបាញ់ទម្លាក់ដោយអ៊ីរ៉ង់
យោងតាមការចុះផ្សាយរបស់ Hindustan Times កាលពីថ្ងៃទី២៨ ខែកក្កដា ឆ្នាំ២០១៩ ដោយដកស្រង់សម្តីប្រភពយោធាឥណ្ឌាថា កងទ័ពអាកាសឥណ្ឌា កំពុងគិតពិចារណាឡើងវិញក្នុងការទិញដ្រូនអាមេរិក ចំនួន៣០គ្រឿង ដែលមានតម្លៃ ៦ពាន់លានដុល្លារ បន្ទាប់ពីដ្រូនអាមេរិកមួយគ្រឿងត្រូវបានទាហានអ៊ីរ៉ង់ បាញ់ទម្លាក់កាលពីខែមុន។ 
សូមបញ្ជាក់ថា កងទ័ពអាកាសឥណ្ឌា កំពុងបារម្ភអំពីប្រសិទ្ធភាព និងការរស់រាន (ភាពរឹងមាំ) របស់ដ្រូនអាមេរិក ក្នុងអំឡុងប្រតិបត្តិការនៅតាមដែនអាកាសព្រំដែនឥណ្ឌា ជាពិសេសជាមួយប្រទេសប៉ាគីស្ថាន ដែលជាសត្រូវស្លាប់រស់។
គួររំលឹកថា កាលពីថ្ងៃទី២០ ខែមិថុនា ឆ្នាំ២០១៩ យន្តហោះដ្រូនអាមេរិក RQ-4A Global Hawk ត្រូវបានបាញ់ទម្លាក់ដោយប្រព័ន្ធការពារដែនអាកាសអ៊ីរ៉ង់។ យោធាអាមេរិកអះអាងថា ដ្រូនរបស់ខ្លួននេះ គឺបានប្រតិបត្តិការក្នុងដែនអាកាសអន្តរជាតិលើតំបន់ច្រកសមុទ្រ Hormuz ប៉ុន្តែអ៊ីរ៉ង់ចោទថា ដ្រូននេះ គឺបានឆ្លងចូលព្រំដែនរបស់ខ្លួន ដើម្បីឈ្លបការណ៍៕
ប្រភព៖ Hindustan Times
