ប្រាក់ចំណេញរបស់ក្រុមហ៊ុន Nokia ថយចុះនៅត្រីមាសទី២នេះ
(ក្រុងហែលស៊ីនគី)៖ ក្រុមហ៊ុនផលិតឧបករណ៍ទូរគមនាគមន៍ Nokia របស់ប្រទេស ហ្វាំងឡង់ បានឲ្យដឹងកាលពីថ្ងៃព្រហស្បតិ៍ថា ការខាតបង់របស់ក្រុមហ៊ុនបានថយចុះនៅត្រីមាសទី២ ឆ្នាំនេះ ដោយសារតម្រូវការបណ្តាញទូរស័ព្ទចល័តជំនាន់ក្រោយមានភាពរឹងមាំ ហើយក្រុមហ៊ុនរក្សាការព្យាករសម្រាប់រយៈពេលពេញមួយឆ្នាំនៅដដែល។
ក្រុមហ៊ុន Nokia បានឲ្យដឹងក្នុងសេចក្តីថ្លែងការណ៍មួយថា ក្រុមហ៊ុនបានកត់ត្រាការខាតបង់សុទ្ធចំនួន ១៩៣ លានអឺរ៉ូ (២១៥ លានដុល្លារ) នៅអំឡុងពីខែមេសាដល់ខែមិថុនា ធៀបនឹងការខាតបង់ចំនួន ២៧១ លានអឺរ៉ូក្នុងរយៈពេលដូចគ្នាកាលពីឆ្នាំមុន។
ប្រាក់ចំណូលបានកើនឡើង ៨,២ ភាគរយ ដល់ ៥,៧ ពាន់លានអឺរ៉ូ ដែលខ្ពស់ជាងការព្យាកររបស់ក្រុមអ្នកវិភាគ។
សម្រាប់ប្រាក់ចំណេញប្រតិបត្តិការវិញ ការខាតបង់នៅត្រីមាសទី២ នេះបានថយចុះមកនៅត្រឹម ៥៧ លានអឺរ៉ូ ពីចំនួន ២២១ លានអឺរ៉ូ ក្នុងរយៈពេលដូចគ្នាកាលពីឆ្នាំមុន។
ក្រុមហ៊ុន Nokia កំពុងកំណត់ទិសដៅអនុបាតប្រាក់ចំណេញប្រតិបត្តិការមួយដែលមានចន្លោះពី ៩ ទៅ ១២ ភាគរយ សម្រាប់ឆ្នាំ ២០១៩ និងពី ១២ ទៅ ១៦ ភាគរយនៅឆ្នាំ ២០២០៕ 
ប្រភព៖ AFP
