ក្នុងឆមាសទី១ ឆ្នាំនេះ រាជរដ្ឋាភិបាលប្រមូលពន្ធបានជាង ១,៥ ពាន់លានដុល្លារ !
(ភ្នំពេញ)៖ តាមសេចក្តីប្រកាសព័ត៌មានរបស់ អគ្គនាយកដ្ឋានពន្ធដារ កាលពីល្ងាចថ្ងៃពុធ បានបង្ហាញថា អគ្គនាយកដ្ឋានពន្ធដារប្រមូលចំណូលពន្ធអាករបានជាង ១,៥ ពាន់លានដុល្លារ ក្នុងឆមាសទី១ ឆ្នាំ ២០១៩ កើនឡើងជាង ៣២៤ លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។
ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំឆមាសទី១ ឆ្នាំ ២០១៩ និងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ លោក គង់ វិបុល អគ្គនាយកនៃនាយកដ្ឋានពន្ធដារបានឲ្យដឹងថា ក្នុងរយៈពេល ៦ ខែ ឆ្នាំ ២០១៩ ចំណូលពន្ធអាករគ្រប់ប្រភេទដែលប្រមូលបានមានជាង ១,៥ ពាន់លានដុល្លារ ស្មើនឹង ៦៦,៧១ ភាគរយ បើធៀបរយៈពេលដូចគ្នាកាលពីឆ្នាំមុន។
សូមបញ្ជាក់ថា ក្នុងរយៈពេល ៥ ឆ្នាំចុងក្រោយនេះ អគ្គនាយកដ្ឋានពន្ធដារ សម្រេចបានកំណើនចំណូលពន្ធក្នុងរង្វង់ប្រមាណ ២០ ភាគរយ ក្នុង ១ ឆ្នាំ គិតចាប់តាំងពីឆ្នាំ ២០១៤ មក បន្ទាប់ពីរដ្ឋាភិបាលបានដាក់ចេញនូវកំណែទម្រង់ស៊ីជម្រៅក្រោយការបោះឆ្នោតឆ្នាំ ២០១៣៕
អត្ថបទ៖ ឆ្មាសរ
