លោក សម រង្ស៊ី ៖ ការអនុញ្ញាតឲ្យចិនមានវត្តមាននៅកម្ពុជា រួមទាំងកងទ័ពផងនោះ គឺដើម្បីការពារអំណាចលោក ហ៊ុន សែន តែប៉ុណ្ណេាះ
ភ្នំពេញ៖ ដោយសារកម្ពុជាជាផ្នែកមួយរបស់ខ្លួន ប្រទេសចិននឹងធ្វើឱ្យកម្ពុជាក្លាយទៅជាត្រីមុខ ដើម្បីអនុវត្តយុទ្ធសាស្រ្តពង្រីកនយោបាយរបស់ខ្លួន ដោយកសាងនូវទីតាំងយោធាក្នុងប្រទេសកម្ពុជា ជាដើម។ បញ្ហានេះនឹងមានផលប៉ះពាល់ធំធេង ពីព្រោះវាអាចប៉ះពាល់ដល់សន្តិភាព និងស្ថិរភាពនៅក្នុងតំបន់»។ នេះជាការលើកឡើងក្នុងសេចក្តីប្រកាសព័ត៌មានរបស់អតីតមេដឹកនាំបក្សប្រឆាំង។
ការលើកឡើងរបស់លោក សម រង្ស៊ី នៅពេលនេះគឺបន្ទាប់ពីសារព័ត៌មានធំមួយរបស់សហរដ្ឋអាមេរិក The Wall Street Juornal បានចុះផ្សាយថា កម្ពុជាបានធ្វើការចុះកិច្ចព្រមព្រៀងសម្ងាត់មួយជាមួយប្រទេសចិនក្នុងការផ្ដល់ផ្នែកខ្លះនៃមូលដ្ឋានទ័ពជើងទឹកខ្មែរឲ្យទៅកងទ័ពជើងទឹកចិន ដើម្បីអាចដាក់ទ័ព សព្វាវុធ និងចតនាវាបានក្នុងកុងត្រាចំនួន៣០ឆ្នាំ។
លោក សម រង្ស៊ី បានលើកឡើងថា រដ្ឋាភិបាលរបស់លោក ហ៊ុន សែន កំពុងតែសប្បាយរីករាយក្នុងការបញ្ចូលអាណានិគមថ្មីរបស់ចិន តាមរយៈការទទួលជំនួយដ៏ច្រើនសម្បើមពីចិន ដោយគ្មានតម្លាភាព គ្មានគិតពីប្រជាធិបតេយ្យ សិទ្ធិមនុស្ស និងបរិស្ថាន ធ្វើយ៉ាងណាឲ្យតែលោក ហ៊ុន សែន និងមន្ត្រីរបស់ខ្លួនអាចបន្តធំធាត់ទៅមុនទៀតប៉ុណ្ណេាះ។
លោក សម រង្ស៊ី បានបន្ថែមផងដែរថា ការអនុញ្ញាតឲ្យចិនមានវត្តមាននៅកម្ពុជា រួមទាំងកងទ័ពផងនោះ គឺដើម្បីការពារអំណាចផ្ដាច់ការរបស់លោក ហ៊ុន សែន តែប៉ុណ្ណេាះ។
អ្នកនាំពាក្យបក្សប្រជាជនកម្ពុជា លោក សុខ ឥសាន បានច្រានចោលការលើកឡើងនេះ និងថាជាការមួលបង្កាច់ទាំងគ្មានភស្ដុតាងជាក់លាក់ និងគ្មានការទទួលខុសត្រូវពីសំណាក់លោក សម រង្ស៊ី៕
អត្ថបទ៖ សុខ លាភ
