កម្ពុជាចង់នាំអង្ករដែលទទួលបានចំណាត់ថ្នាក់លេខ១ ទៅកាន់ប្រទេសឥណ្ឌូណេស៊ី
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានគូសបញ្ជាក់ថា កម្ពុជាមានបំណងនាំអង្ករក្រអូប «ផ្កាម្លិះអង្គរ» ដែលទទួលបានចំណាត់លេខ១ កាលពីឆ្នាំ២០១៨ ទៅកាន់ប្រទេសឥណ្ឌូណេស៊ី ដើម្បីបង្កើនទំហំពាណិជ្ជកម្មទ្វេភាគី និងពង្រឹងកិច្ចសហការលើឧស្សាហកម្មផលិតសម្ភារ និងគ្រឿងបង្គុំទោចក្រយាននៅក្នុងប្រទេស ព្រមទាំងអភិវឌ្ឍឧស្សាហកម្មគាំទ្រសម្រាប់ការផលិតទោចក្រយាន ដើម្បីបង្កើនតម្លៃបន្ថែមក្នុងស្រុកសម្រាប់ផលិតផលនេះ និងនាំចេញផលិតផលសម្រេច ១០០% ទៅកាន់ទីផ្សារអន្តរជាតិ។
ការថ្លែងរបស់រដ្ឋមន្រ្តីខាងលើ ក្នុងឱកាសអញ្ជើញចូលរួមជាគណៈអធិបតីភាព ជាមួយលោកស្រី អ៊ីណា ហានីងត្យាស គ្រីស្នាមឺទី (Ina Hagningtyas Krisnamurthi) ទីប្រឹក្សាពិសេសក្រសួងការបរទេសទទួលបន្ទុកសេដ្ឋកិច្ចការទូតឥណ្ឌូណេស៊ី ក្នុងពិធីសម្ពោធពិព័រណ៍ពាណិជ្ជកម្មមិត្តភាពកម្ពុជា-ឥណ្ឌូនេស៊ី ឆ្នាំ២០១៩ ដែលរៀបចំឡើងនៅសួនច្បារខាងជើងស្ពានថ្ម ក្បែរព្រះរាជដំណាក់ក្រុងសៀមរាប កាលពីរសៀលថ្ងៃទី១៩ ខែកក្កដា ឆ្នាំ២០១៩ ក្រោមការចូលរួមពីអាជ្ញាធរដែនដី មន្ត្រីរាជការ ពាណិជ្ជករ អាជីវករ ភ្ញៀវទេសចរ និងប្រជាពលរដ្ឋជាង ១០០០នាក់។
នៅក្នុងឱកាសនោះ លោក ប៉ាន សូរស័ក្តិ បានលើកឡើងពីទំនាក់ទំនងពាណិជ្ជកម្មទ្វេភាគីកម្ពុជា-ឥណ្ឌូណេស៊ី ដែលកាលពីឆ្នាំ២០១៨ សម្រេចបានទឹកប្រាក់ ៥៥៨,៦២លានដុល្លារ (កម្ពុជានាំចូល ៥២៥,៦លានដុល្លារ និងនាំចេញ ៣៣លានដុល្លារ) និងកិច្ចសហប្រតិបត្តិការលើវិស័យសេដ្ឋកិច្ច (ការមិនយកពន្ធត្រួតគ្នា និងទប់ស្កាត់អំពើបន្លំពន្ធពាក់ព័ន្ធប្រាក់ចំណូល) ក៏ដូចជាវិស័យទេសចរណ៍ (ការបើកជើងហោះហើរត្រង់ពីទីក្រុងហ្សាកាតា-ភ្នំពេញ) ដែលប្រទេសទាំងពីរបានចុះអនុស្សរណៈនាពេលថ្មីៗនេះ។
សូមជម្រាបថា គិតត្រឹមខែមេសា ឆ្នាំ២០១៩ ទំហំពាណិជ្ជកម្មទ្វេភាគីនៃប្រទេសទាំងពីរ សម្រេចបានទឹកប្រាក់ ១៩៦,២៦លានដុល្លារ គឺបានកើនឡើង ១០,៤៨% ធៀបរយៈពេលដូចគ្នា ក្នុងឆ្នាំ២០១៨ ក្នុងនោះ ការនាំចេញរបស់កម្ពុជាទៅឥណ្ឌូណេស៊ី បានកើនឡើង ៧,៧៥% និងនាំចូលកើនឡើង ៥៤,១៨%។ ដោយឡែកសម្រាប់ឧស្សាហកម្មទោចក្រយាន កម្ពុជាបាននាំចូលបំណែក និងគ្រឿងបន្លាស់ (លីប, តួ, ដៃ, ចង្កៀង, អំព្រីយ៉ា…) ពីឥណ្ឌូណេស៊ីចំនួន ៧,១៩លានដុល្លារ នៅក្នុងឆ្នាំ២០១៨៕
កែសម្រួល៖ ឆ្មាសរ
ប្រភព៖ ក្រសួងពាណិជ្ជកម្ម
