លោក ជួន ណារិន្ទ៖ នគរបាលដែលដេកស្លាប់មុខឡានដៃកាន់កាំភ្លើង នៅខេត្តព្រះសីហនុ ជាការធ្វើអត្ដឃាតខ្លួនឯង

ព្រះសីហនុ៖  មន្ដ្រីនគរបាលអន្ដោប្រវេសន៍ ដែលត្រូវបានគេប្រទះឃើញដេកស្លាប់មុខឡាន ហើយដៃមានកាន់កាំភ្លើង គឺជាការធ្វើអត្តឃាតដោយខ្លូនឯង។ នេះបើយោងតាមលោក ជួន ណារិន្ទ ស្នងការនគរបាលខេត្តព្រះសីហនុ បានប្រាប់អង្គភាពព័ត៌មានក្នុងស្រុកនៅរសៀលថ្ងៃទី២១ ខែកក្កដា ឆ្នាំ២០១៩នេះ។

លោកថា ឆ្លងតាមការស្រាវជ្រាវ និងការធ្វើកោសល្យវិច្ឆ័យពីសមត្ថកិច្ចជំនាញ បានបង្ហាញថា មន្ដ្រី​នគរ​បាល​ដែលប្រទះឃើញដេកស្លាប់នោះ បានធ្វើអត្ដឃាតដោយខ្លួនឯង ក៏ព្រោះ​តែជនរង​គ្រោះមាន​ជំងឺ​ស្ដ្រេះ និងមួយទៀត មានជំងឺប្រចាំការដែលព្យាបាលមិនជា ដោយមិត្តរួមការងារតែង​តែលឺជនរង​គ្រោះ​ថ្អួញថ្អែរថា ឈឺក្បាល។

ជនរងគ្រោះឈ្មោះ ហេង សៅគីរី មានឋានន្ដរស័ក្ដិ ថ្នាក់វរសេនីយ៍ត្រី (ស័ក្ដិ៤) តួនាទី នាយផ្នែក​សេនា​ធិ​ការ នាយកដ្ឋានច្រកទ្វារទី២ នៃអគ្គនាយកដ្ឋានអន្ដោប្រវេសន៍ ក្រសួងមហាផ្ទៃ។ ជនរងគ្រោះ​ប្រើកាំភ្លើង​ម៉ាក TAURUS ហើយរូបគេទម្លាប់ប្រើដៃឆ្វែង ស៊ីចង្វាក់នឹងស្នាមរបួសត្រង់​ចំណុចសៀតថ្កា​ខាងឆ្វេងធ្លាយ​ទៅម្ខាងទៀត ដែលបណ្តាលឲ្យជនរងគ្រោះស្លាប់។

ជាមួយគ្នានេះដែរសមត្ថកិច្ចក៏បានរកឃើញមានលិខិតបណ្ដាំ នៅក្នុងរថយន្ដដោយមានសរសេរអក្សរថា «លាហើយ» ដែលអក្សរនេះប្រធានអង្គភាពរបស់ជនរងគ្រោះ និងមិត្ដរួមការងារ ទទួលស្គាល់ថា នេះគឺជាអក្សររបស់ជនរងគ្រោះយ៉ាងពិតប្រាកដ។ នេះជាអ្វីដែលលោកស្នងការបានគូសបញ្ជាក់។

សូមជម្រាបថា ជនរងគ្រោះត្រូវបានប្រជាពលរដ្ឋប្រទះឃើញដេកស្លាប់ នៅមុខរថយន្ដដោយ​ក្នុងដៃមាន​កាន់កាំភ្លើងខ្លី០១ដើម នៅលើផ្លូវបេតុង ត្រង់ចំណុច កន្លែងពុះដីឡូត៍ ស្ថិតនៅក្រុម៤ ភូមិ៤ ឃុំអូរត្រេះ ស្រុក​ស្ទឹងហាវ ខេត្តព្រះសីហនុ៕

អត្ថបទ៖ សុខ លាភ