វីដេអូស្តែងៗ តារាសម្តែងហុងកុងជើងចាស់ Simon Yam Tat-wah ត្រូវគេឡើងលើឆាកចាក់លោកជាច្រើនកាំបិត

តារាសម្តែងហុងកុងជើងចាស់លោក Simon Yam Tat-wah ត្រូវបានជនអនាមិកឡើងមកចាក់ជាច្រើនកាំបិតត្រង់ពោះ ខណៈដែលលោកចូលរួមក្នុងព្រឹត្តិការណ៍សម្ពោធហាងលក់សម្ភារៈមួយនៅខេត្ត Guangdong ភាគខាងត្បូងប្រទេសចិន។ លោក​ Simon Yam Tat-wah ត្រូវបានគេចាក់នៅព្រឹកថ្ងៃសៅរ៍ ខែកក្កដានេះ កាលពីវេលាម៉ោង១០ព្រឹក ដោយយោងតាមសម្តីអ្នកចាត់ការ តារាសម្តែងរូបនេះត្រូវបានចាក់ត្រង់ពោះនិងត្រង់ដៃរបស់គាត់ក៏ត្រូវរបួសដែរ។

យោងតាមវីដេអូដែលបានបង្ហោះគេសង្កេតឃើញថាមុនពេលកើតហេតុ លោក Yam បាននិយាយឆ្លងឆ្លើយជាមួយនឹងពិធីការិនី និងឱ្យភ្ញៀវដែលបានចូលរួមឡើងមកវេទិកា ដើម្បីមកទទួលរង្វាន់។ ខណៈដែលមានភ្ញៀវឡើងមកវេទិកា គេក៏សង្កេតឃើញបុរសម្នាក់ស្លៀកខោខូវប៊យ អាវវាលក្លៀក ឡើងមកចាក់លោកជាច្រើនកាំបិត ហើយបន្ទាប់មកក៏មានកងកម្លាំងសន្តិសុខជាច្រើនបានធ្វើការបង្ក្រាបនិងនាំជនបង្កចេញឲ្យឆ្ងាយពីកន្លែងកើតហេតុ។ ក្រោយពីរងការវាយប្រហារនេះ លោក Simon Yam Tat-wah នៅតែមានស្មារតី ហើយក៏ត្រូវគេបញ្ជូនមកមន្ទីរពេទ្យ។ ក្នុងនោះអ្នកគាំទ្ររបស់តារាសម្តែងហុងកុងរូបនេះបានជូនពរឲ្យឆាប់ជាសះស្បើយ និងកុំឲ្យមានអ្វីប៉ះពាល់ដល់អាយុជីវិត៕