ពាណិជ្ជកម្មចិននឹងកាន់តែប្រសើរ ជាមួយនឹងទីផ្សារថ្មី
(ប៉េកាំង)៖ យោងតាមមន្ត្រីគយជាន់ខ្ពស់កាលពីចុងសប្តាហ៍មុន បានឲ្យដឹងថា ប្រទេស ចិន មានឧបករណ៍គោលនយោបាយគ្រប់គ្រាន់ និងវិធានការថ្មីៗ ដើម្បីបង្កើតលទ្ធផលកាន់តែប្រសើរខ្លាំងថែមទៀតដល់រចនាសម្ព័ន្ធពាណិជ្ជកម្មបរទេស និងធ្វើឲ្យទំនាក់ទំនងជាមួយទីផ្សារថ្មីៗកាន់តែស៊ីជម្រៅនៅឆមាសទី២ ឆ្នាំនេះ ជាពិសេសជាមួយប្រទេសដែលចូលរួមក្នុងគម្រោងខ្សែក្រវាត់ និងផ្លូវ ។
លោក Li Kuiwen អ្នកនាំពាក្យរដ្ឋបាលទូទៅគយចិនបានឲ្យដឹងក្នុងសន្និសីទព័ត៌មានខ្លីមួយថា៖ «យើងប្រឈមនឹងផលវិបាកជាច្រើនក្នុងការសម្រេចបានកំណើនពាណិជ្ជកម្មប្រទេសដោយស្ថិរភាព»។
ការអត្ថាធិប្បាយរបស់លោក Li បានធ្វើឡើងបន្ទាប់ពីរដ្ឋបាលគយចិនបានចេញផ្សាយទិន្នន័យពាណិជ្ជកម្មរបស់ប្រទេស ចិន សម្រាប់ឆមាសទី១ ឆ្នាំ ២០១៩ នេះ។
ពាណិជ្ជកម្មបរទេសរបស់ចិនបានកើនឡើង ៣,៩ ភាគរយ នៅឆមាសទី១ ឆ្នាំនេះធៀបនឹងរយៈពេលដូចគ្នាកាលពីឆ្នាំមុន ដែលសរុបមានចំនួន ១៤,៦៧ ពាន់ពាន់លានយន់ (២,១៦ ពាន់ពាន់លានដុល្លារ) ដោយការនាំចេញបានកើនឡើង ៦,១ ភាគរយធៀបនឹងរយៈពេលដូចគ្នាកាលពីឆ្នាំមុន។
ទិន្នន័យគយបានបង្ហាញទៀតថា ការនាំចូលបានកើនឡើង ១,៤ ភាគរយ ដែលធ្វើឲ្យអតិរេកពាណិជ្ជកម្មរបស់ចិនកើនឡើង ៤១,៦ ភាគរយ នៅឆមាសទី១ ឆ្នាំនេះធៀបនឹងរយៈពេលដូចគ្នាកាលពីឆ្នាំ ២០១៨ ដល់ ១,២៣ ពាន់ពាន់លានយន់។
កាលពីឆ្នាំមុន ពាណិជ្ជកម្មបរទេសនៅឆមាសទី១ បានកើនឡើង ៧,៩ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៧ ដោយការនាំចេញបានកើនឡើង ៤,៩ ភាគរយ ហើយការនាំចូលបានកើនឡើង ១១,៥ ភាគរយ។
មន្ត្រីគយបានឲ្យដឹងថា ពាណិជ្ជកម្មជាមួយប្រទេសចូលរួមក្នុងគម្រោងខ្សែក្រវាត់ និងផ្លូវមានទំហំធំជាងពាណិជ្ជកម្មសរុបក្នុងឆមាសទី១ ឆ្នាំនេះ ខណៈដែលការនាំចូល និងការនាំចេញទៅកាន់ទីផ្សារដែលចូលរួមក្នុងគម្រោងនេះ បានកើនឡើងដល់ ៤,២៤ ពាន់ពាន់លានយន់។ ចំនួននេះស្មើនឹងកំណើន ៩,៧ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលខ្ពស់ជាងកំណើនពាណិជ្ជកម្មសរុប ៥,៨ ពិន្ទុភាគរយ ដែលស្មើនឹង ២៨,៩ ភាគរយ នៃពាណិជ្ជកម្មសរុបរបស់ចិន៕
កែសម្រួល៖ ឆ្មាសរ
ប្រភព៖ AFP
