រដ្ឋាភិបាលអាមេរិក ព្រមានពីការអស់លុយចាយ
(វ៉ាស៊ីនតោន)៖ យោងតាមការព្រមានពីលោករដ្ឋមន្ត្រីក្រសួងហិរញ្ញវត្ថុ Steven Mnuchin កាលពីចុងសប្តាហ៍មុន បានឲ្យដឹងថា រដ្ឋាភិបាលសហរដ្ឋអាមេរិកអាចអស់ប្រាក់សម្រាប់ដំណើរការរដ្ឋាភិបាលនៅដើមខែកញ្ញានេះ លុះត្រាតែសភាអនុញ្ញាតឲ្យរដ្ឋាភិបាលខ្ចីប្រាក់បន្ថែមទៀត។
ក្រសួងហិរញ្ញវត្ថុបាន និងកំពុងចាត់វិធានការវិសាមញ្ញនានាចាប់ពីខែមីនាមក ដើម្បីរៀបចំសម្រួលសាច់ប្រាក់របស់ខ្លួនក្នុងការបន្តបង់ចំណាយរបស់រដ្ឋាភិបាល បន្ទាប់ពីកម្រិតបំណុលបានកើនឡើងដល់កម្រិតខ្ពស់កំណត់ (ពិតាន) ២២ ពាន់លានដុល្លាររបស់ខ្លួន ដែលបានកំណត់ដោយសភា។
ក្រុមមន្ត្រីបានចេញផ្សាយការព្រមានដ៏គួរឲ្យភ័យខ្លាចនានាថា ដោយគ្មានការដំឡើងកម្រិតកំណត់កម្ចីសហរដ្ឋអាមេរិកអាចក្ស័យធនលើកាតព្វកិច្ចបំណុលរបស់ខ្លួនជាលើកដំបូង ហើយមន្ត្រីទាំងនោះបាន និងកំពុងជំរុញឲ្យសភាចាត់វិធានការមុនពេលវិស្សមកាលរដូវក្តៅចូលមកដល់នៅចុងខែនេះ។
លោក Mnuchin បានព្រមានក្នុងលិខិតមួយដែលផ្ញើទៅកាន់អ្នកនាំពាក្យសភាជាន់ទាបលោកស្រី Nancy Pelosi ថា៖ «ដោយផ្អែកលើការព្យាករដែលត្រូវបានធ្វើបច្ចុប្បន្នភាព មានសេណារីយោ ១ ដែលយើងអស់សាច់ប្រាក់នៅដើមខែកញ្ញា មុនពេលសភាបើកសម័យប្រជុំជាថ្មី»។
លោកស្រី Pelosi បានឲ្យដឹងកាលពីសប្តាហ៍មុនថា លោកស្រីកំពុងធ្វើការងារលើការសិក្សាបញ្ចប់កិច្ចព្រមព្រៀងមួយដែលនឹងដំឡើងពិតានបំណុលបណ្តោះអាសន្នមុនពេលសភាជាន់ទាបបិទសម័យប្រជុំនៅថ្ងៃទី ២៦ ខែកក្កដានេះ។ នេះបើយោងតាមសេចក្តីរាយការណ៍ព័ត៌មាននានា។
សហរដ្ឋអាមេរិកបានបាត់បង់ចំណាត់ថ្នាក់បំណុលកម្រិត AAA របស់ខ្លួនក្នុងឆ្នាំ ២០១១ បន្ទាប់ពីមានជម្លោះក្នុងសភាជុំវិញថា តើត្រូវដំឡើងពិតានបំណុលសម្រាប់កម្ចីរដ្ឋាភិបាលអាមេរិក ឬអត់? ដែលបង្កើតឲ្យមានភាពអាចកើតមាននៃការក្ស័យធនរបស់រដ្ឋាភិបាលអាមេរិក៕
កែសម្រួល៖ ឆ្មាសរ
ប្រភព៖ AFP
