ជនសង្ស័យ៤នាក់ ត្រូវសមត្ថកិច្ចកំពុងតាមចាប់ខ្លួន ពាក់ព័ន្ធនឹងបទល្មើសព្រៃឈើ នៅខេត្តមណ្ឌលគិរី

ភ្នំពេញ៖ ជនសង្ស័យ៤នាក់ទៀត កម្លាំងអាវុធហត្ថចកំពុងតាមចាប់ខ្លួន តាមដីកាតុលាការ ដែល​មាន​ការ​ពាក់ព័ន្ធនឹងបទល្មើសព្រៃឈើ នៅខេត្តមណ្ឌលគិរី។ នេះបើយោងតាម អ្នកនាំពាក្យគណៈកម្មការជាតិ ដើម្បី​ទប់ស្កាត់និងបង្ក្រាបបទល្មើសធនធានធម្មជាតិ លោកឧត្តមសេនីយ៍ត្រី អេង ហ៊ី បានបញ្ជាក់ប្រាប់​បណ្តាញព័ត៌មាន ក្នុងស្រុកនៅព្រឹកនេះ​។

មនុស្ស៤នាក់នោះ គឺជាប្រធានក្រុមហ៊ុនដែលពាក់ព័ន្ធនឹងបទល្មើសព្រៃឈើក្នុងខេត្តមណ្ឌលគិរី។ លោក​ថា កន្លងទៅតុលាការបានចេញដីកាកោះហៅជនសង្ស័យទាំង៤នាក់នេះ ប៉ុន្តែពួកគេមិន​ចូលខ្លួន​នោះ​ទេ​។ ទោះជាយ៉ាងនេះក្តី អ្នកនាំពាក្យគណៈកម្មការជាតិ ដើម្បីទប់ស្កាត់និងបង្ក្រាបបទ​ល្មើសធនធាន​ធម្ម​ជាតិ​រូបនេះ មិនទាន់អាចបង្ហើបឈ្មោះ ជនសង្ស័យទាំង៤នាក់នេះនោឡើយទេ។

អ្នកនាំពាក្យរូបនេះបញ្ជាក់ថា ចាប់ពីពេលបើកយុទ្ធនាការទ្រង់ទ្រាយធំ និងការដាក់ចេញនូវ វិធាន​ការ​តឹង​រឹង កម្លាំងកងរាជអាវុធហត្ថ និងកម្លាំងជំនាញពាក់ព័ន្ធបានធ្វើ​ការស្រាវជ្រាវស៊ើប​អង្កេតបទ​ល្មើសព្រៃ​ឈើ​នៅខេត្តមណ្ឌលគិរី បានចាប់ខ្លួនជនសង្ស័យ៤នាក់បញ្ជូននៅតុលាការ។ ការបំផ្លាញចោលវត្ថុតាង​ដែល​ជា​មធ្យោបាយដឹងជញ្ជូននោះ នៅតែបន្តអនុវត្តយ៉ាងក្តៅគគុក៕

អត្ថបទ៖ សុខ លាភ