លោក អ៊ុំ សំអាន៖ ជួប សម្លាប់ ក្នុងពន្ធនាគារគេមិនអនុញ្ញាតិអោយជួបនិយាយជាមួយអ្នកទោសដទៃទេ
ភ្នំពេញ៖ លោក អ៊ុំ សំអាន បានអោយដឹងថា រឿងចម្លែករបស់ ជួប សម្លាប់ ក្នុងពន្ធនាគារមិនត្រូវបានគេអនុញ្ញាតិអោយជួបនិយាយលេងជាមួយអ្នកទោសដទៃទៀតនោះទេ។ នេះបើយោងតាមទំព័រហ្វេសបុករបស់លោកនៅរសៀលថ្ងៃនេះ។
ការលើកឡើងបែបនេះ ធ្វើឡើងចំថ្ងៃដែលអង្គការសង្គមស៊ីវិល យុវជន រួមជាមួយអ្នកស្រលាញ់លោកបណ្ឌិតកែម ឡី រលឹកខូប៣ឆ្នាំនៃការបាញ់សម្លាប់រូបលោក។
លោក អ៊ុំ សំអាន បានលើកឡើងថា រឿងចម្លែករបស់ ជួប សម្លាប់ ក្នុងពន្ធនាគារ! កាលខ្ញុំជាប់ពន្ធនាគារ បានដឹងថា ជួប សម្លាប់មិនត្រូវបានគេអនុញ្ញាតិអោយជួបនិយាយលេងជាមួយអ្នកទោសដទៃទៀតនោះទេ ទោះកាត់ទោសរួចហើយក៏ដោយ ព្រោះអ្នកទោសទាំងអស់ទោះសម្លាប់សាហាវយ៉ាងណាក៏ដោយ ក្រោយកាត់ទោសរួច គេអនុញ្ញាតិអោយនិយាយគ្នាលេង។
លោកបន្ថែមថា ចម្លែកតែ ជួប សម្លាប់ មិនត្រូវបានគេអនុញ្ញាតិអោយជួបនិយាយលេងជាមួយនរណានោះទេ។ ឬក៏គេខ្លាចបែកធ្លាយការពិត? បានដំណឹងពីអ្នកជាប់ពន្ធនាគារជាមួយ ជួប សម្លាប់ ថាមានគេផ្ញើលុយអោយគាត់ចាយម្តង ២០មុឺនរៀលតាមវីងក្នុងគុក ដែលតាមអាសុីសេរីផ្សាយថាក្រុមគ្រួសារគាត់ នៅសៀមរាប មិនមានលុយកាក់ផង។ ជួប សម្លាប់ អួតប្រាប់អ្នកទោសថា ធ្វើដូចគាត់ទើបបានលុយ ហើយនិយាយថា គាត់នឹងជាប់គុកយ៉ាងច្រើន៥ឆ្នាំ។
ជាមួយគ្នានេះដែរលោកបានចោទជាសំនួរថា ខួប៣ឆ្នាំ នៃឃាតកម្មលើបណ្ឌិត កែម ឡី តើយុត្តិធម៌ សម្រាប់គាត់នៅឯណា?៕
អត្ថបទ៖ សុខ លាភ
