សមត្ថកិច្ចចាប់ខ្លួនយុវជន ៣នាក់ ពេលជួបជុំ គោរពវិញ្ញាណក្ខន្ធរបស់សពលោក កែម ឡី នៅការ៉ាស់សាំង កាល់តិច ស្តុបបូកគោ
ភ្នំពេញ៖ យុវជន ៣នាក់ ត្រូវបានប៉ូលិសខណ្ឌចំការមន ចាប់ខ្លួនដើម្បីយកទៅសួរនាំ នៅអធិការដ្ឋាននគរបាលខណ្ឌចំការមន និងចាត់វិធានការបន្ដ ពេលជួបជុំ គោរពវិញ្ញាណក្ខន្ធរបស់សពលោក កែម ឡី នៅការ៉ាស់សាំង កាល់តិច ស្តុបបូកគោ នាព្រឹកថ្ងៃទី១០ ខែកក្កដា ឆ្នាំ២០១៩។
អាជ្ញាធរខណ្ឌចំការមន បានឲ្យដឹងថា ដោយទទួលបានការស្នើសុំពីម្ចាស់ស្ថានីយ៍ប្រេងកាល់តិចស្តុបបូកគោ ដោយស្នើសុំអាជ្ញាធរ ជួយហាមឃាត់ប្រជាជនដែលមកកាន់ទីតាំងស្ថានីយ៍នេះ ដើម្បីធ្វើការអុជទៀនធូប គោរពដល់វិញ្ញាណក្ខន្ធសព លោក កែម ឡី ព្រោះថាកន្លែងពួកគាត់ ត្រូវមកអុជទៀនធូកនេះ ជាទីតាំងឯកជន ពិសេសជាកន្លែងប្រេងសាំង ដែលអាចងាយនឹងរងនូវគ្រោះថ្នាក់អគ្គិភ័យ។
សូមរំលឹកថាបណ្ឌិត កែម ឡីជាអ្នកវិភាគបញ្ហាសង្គម និងនយោបាយដ៏មានប្រជាប្រិយភាព លោកត្រូវបានឃាតករបាញ់សម្លាប់ នៅព្រឹកថ្ងៃទី១០ កក្កដា ឆ្នាំ២០១៦ ក្នុងហាងលក់ទំនិញស្តារម៉ាត (Star Mart) ក្បែរស្តុបបូកគោ ភ្នំពេញ៕
អត្ថបទ៖ សុខ លាភ
