លោក ព្រាប កុល សម្តែងការព្រួយបារម្ភចំពោះជនបរទេស សុំចូលសញ្ជាតិខ្មែរ

ភ្នំពេញ៖ បន្ទាប់ពីតុលាការកំពូលកម្ពុជា បានសម្រេចអនុញ្ញាតឲ្យចិន១១នាក់ ស្បថ ដើម្បីបាន​ចូលជា​សញ្ជាតិ​ខ្មែរ បន្ទាប់ពីពួកគេបានបំពេញនូវលក្ខណៈសម្បត្តិនៃច្បាប់កម្ពុជាបានកំណត់បានយ៉ាងត្រឹមត្រូវ​នា​យកប្រតិបត្តិការ អង្គការតម្លាភាពកម្ពុជាលោក ព្រាប កុល បានបង្ហាញក្តីបារម្ភរបស់ខ្លួន ចំពោះការ​សុំ​ចូល​ជាសញ្ជាតិ ពីសំណាក់ជនបរទេសនានា។

ក្នុងបណ្តាញទំនាក់ទំនងសង្គម ហ្វេសប៊ុកផ្ទាល់ខ្លួននៅព្រឹកថ្ងៃទី៩ ខែកក្កដា ឆ្នាំ២០១៩នេះ ថា ឆ្នាំមុន ពេលដែល “ច្បាប់សញ្ជាតិថ្មី” ត្រូវបានលើកយកមក ពិភាក្សាជាការប្រញ៉ាប់ លោកដេកមិនលក់ ញ៉ាំមិន ឆ្ងាញ់ រត់ឆ្លេរឆ្លារ ព្រោះចង់ស្នើឲ្យមានការ យកចិត្តទុកដាក់ធ្វើការពិភាក្សា ល្អិតល្អន់ និងចង់ជម្រុញ ឲ្យ​មានការ កែប្រែមាត្រាមួយចំនួន។

លោកថា ពេលនោះពលរដ្ឋខ្មែរងពុំ សូវចាប់អារម្មណ៍បញ្ហានេះទេ ព្រោះពេលនោះរវល់តាមដានរឿង លោកសង្ឃឆាន់ពោត ឬរឿងពោតជាអាវុធប្រល័យលោក។ ពេលនេះ មានជនបរទេសជាច្រើន មិនទាំងចេះនិយាយភាសារខ្មែរផងបានចូលសញ្ជាតិខ្មែរដោយងាយ។

លោកបញ្ជាក់ថា “យើងមិនចង្អៀតចិត្តចំពោះ ការចូលសញ្ជាតិនោះទេ ប៉ុន្តែត្រូវមានច្បាប់ល្អ ហើយមានការអនុវត្តច្បាប់ឲ្យបានត្រឹមត្រូវ។ ប៉ុន្តែច្បាប់យើងមានបញ្ហា រីឯការអនុវត្តន៍ក៏មានបញ្ហា។ នេះហើយជាការបារម្ភរបស់ខ្ញុំ” ។

ច្បាប់សញ្ជាតិថ្មី ត្រូវបានព្រះមហាក្សត្រ ចេញព្រះរាជក្រមនៅថ្ងៃទី២១ ខែមិថុនា ឆ្នាំ២0១៨ ដើម្បីដាក់​ឲ្យ​អ​នុវត្តជាផ្លូវការ។ ច្បាប់ថ្មីនេះ គឺកើតចេញគំនិតផ្តួចផ្តើម របស់រាជរដ្ឋាភិបាល និងទទួលបានការ យល់​ព្រម​​ទាំងស្រុងពីរដ្ឋសភា និងព្រឹទ្ធសភា។

បើតាមច្បាប់ស្តីពីសញ្ជាតិបានចែងថា សម្រាប់ជនបរទេសទូទៅ ដើម្បីអាចស្នើសុំសញ្ជាតិខ្មែរ​តាមរយៈ​សញ្ជាតូបនីយកម្ម មាត្រា១៩ នៃច្បាប់ថ្មី ទាមទារឲ្យជនបរទេស ត្រូវមានគុណសម្បតិ្តចំនួន៥ គឺ ១. បានរស់នៅជាប់រយៈពេល៧ឆ្នាំ ក្នុងប្រទេសកម្ពុជា, ២. មានសីលធម៌, ៣. មិនដែលមានទោស, ៤. ចេះនិយាយ ចេះអក្សរ និងយល់ដឹងខ្លះៗពីប្រវត្តិសាស្ត្រខ្មែរ ហើយទទួលយកបានចំពោះប្រពៃណីខ្មែរ, និង ៥. មានបញ្ញានិងកាយសម្បទាល្អ ៕