ជោគជ័យក្នុងសិល្បះខ្លាំង អ្នកនាង ខ្ញុង សម្រេចបំណងធំទិញរថយន្តកាដូដល់ឪពុកភ្លែត

ភ្នំពេញ៖ តារាកំប្លែងដ៏មានប្រជាប្រិយភាពអ្នកនាង ស្រេង សុកាន់ដា នៅនាង ខ្ញុង មួ​យ​រយៈក្រោយមកនេះហាក់ឃើញជីវិតឡើងកូដខ្លាំងកាក់កបទាំងការងារសិល្បៈ និងជំនួញជាច្រើនមុខក្នុងដៃដូចជា អចលនទ្រព្យលក់ដីឡូតិ៍ លក់សាច់ក្រក ផ្អក ប្រហុក និងផលិតផលថែរក្សាសម្រស់តាមអនឡាញ។

ទន្ទឹមភាពរីកចម្រើនកើនពីមួយថ្ងៃទៅមួយថ្ងៃនេះដែរតារាកំប្លែងស្រីវ័យជ្រេតែសម្រស់បានក្នុងក្រុមនាយ ពែក មី, នាង ខ្ញុង ក៏មិនភ្លេចផងដែរនូវការដឹងគុណដល់លោកឪ​ពុក ដោយថ្មីៗនាងបានបង្ហាញនៅលើបណ្ដាញសង្គមហ្វេសប៊ុកជាមួយឡានថៃ្លតម្លៃរាប់ម៉ឺនដុល្លារជាកាដូផងដែរ។

ជំនួបរូបភាពនេះ ខ្ញុង ក៏ភ្ជាប់សាររៀបរាប់ថា «វាមិនច្រើនទេបើប្រៀបធៀបទៅនឹងគុណបំណាច់ដ៏មហាធំធេងដែលលោកបានផ្តល់កំណើតអោយកូន កូនធ្លាប់សន្យាក្នុងចិត្តកូនរួចហើយថាពេលដែលកូនរឹងដៃរឹងជើងកូននឹងប្រើដៃជើងទាំងគូររបស់កូនដែលលោកបានផ្តល់អោយ អោយមានតំលៃបំផុត និងចិញ្ចឹមថែរក្សាប្អូនៗដូចដែលលោកធ្លាប់បីបា​ច់ថែក្សាកូនអ៊ីចឹងដែរ សូមអោយប៉ាមានក្តីសុខចម្រុងចម្រើន រកស៊ីមានបាន មានសុខភាពល្អ និងអាយុវែងដើម្បីឈរមើលពីភាព ជោគជ័យរបស់កូនបន្តទៀតណាប៉ា ក្តីស្រលា​ញ់​ចេញពីចិត្តព្រះរស់របស់កូន»។