មូលនិធិ IMF អនុម័តកម្ចី ៦ ពាន់លានដុល្លារ សម្រាប់ប៉ាគីស្ថាន
មូលនិធិរូបិយវត្ថុអន្តរជាតិ (IMF) កាលពីថ្ងៃពុធបានអនុម័តទឹកប្រាក់ ៦ ពាន់លានដុល្លារ សម្រាប់ជាកម្ចីរយៈពេល ៣ ឆ្នាំ ដល់ប្រទេស ប៉ាគីស្ថាន ដើម្បីជួយដល់សេដ្ឋកិច្ចរបស់ប្រទេសអាស៊ីខាងត្បូងមួយនេះ។
ជាមួយការអនុម័តរបស់ក្រុមប្រឹក្សាភិបាលរបស់មូលនិធិនេះ IMF នឹងបញ្ចេញទឹកប្រាក់ ១ ពាន់លានដុល្លារ ភ្លាមៗទៅឲ្យប្រទេស ប៉ាគីស្ថាន ហើយនឹងបញ្ចេញប្រាក់ពីដៃគូអន្តរជាតិផ្សេងៗប្រហែល ៣៨ ពាន់លានដុល្លារ ក្នុងអំឡុងពេលកម្មវិធីកំណែទម្រង់សេដ្ឋកិច្ចរបស់ប្រទេស ប៉ាគីស្ថាន។
មូលនិធិ IMF បានឲ្យដឹងក្នុងសេចក្តីថ្លែងការណ៍មួយថា កម្មវិធីនេះមានបំណង «គាំទ្រដល់កម្មវិធីកំណែទម្រង់សេដ្ឋកិច្ចរបស់អាជ្ញាធរ» និងជួយ «កាត់បន្ថយភាពងាយរងគ្រោះសេដ្ឋកិច្ច និងបង្កើតឲ្យមានកំណើតសេដ្ឋកិច្ចប្រកបដោយនិរន្តរភាព និងតុល្យភាព»។
រដ្ឋាភិបាលប៉ាគីស្ថានបានយល់ព្រមលើកម្មវិធីកម្ចីនេះនៅខែមុន និងបានប្រកាសផែនការ ដើម្បីកាត់បន្ថយការចំណាយស៊ីវិល និងបង្កកចំណាយផ្នែកយោធា ខណៈសន្យាបង្កើនប្រាក់ចំណូលប្រកបដោយនិរន្តរភាព ដើម្បីទប់ស្កាត់ឱនភាពសារពើពន្ធ និងសន្យាប្រមូលពន្ធឲ្យបាន ៣៦ ពាន់លានដុល្លារ ៕
កែសម្រួល៖ ស៊ាងម៉ី
ប្រភព៖ AFP
